Shillong, Nailur 20 : Ki phra ngut ki MLA ka United Democratic Party (UDP) ha u bnai ban wan ki lah ban pynïasoh pura noh sha ka BJP lada na ka liang ki bor bahalor jong katei ka party kaba synshar ha ka Sorkar Pdeng ka pdiang ïa ki jingdawa ba ki la dep ban pynsngew.
Ki tyllong khubor ki ïathuh ba lada na ka liang u Myntri Rangbahduh ka Ri, Narendra Modi kumjuh u Myntri Kampohiing ka Ri, u Amit Shah ki pdiang ïa ki mat jingdawa ba ki la dep ban pynsngew ha ka jingkynduh ba dang shen, na ka liang ki MLA ka UDP ki la long kiba kloi ban pynïasoh pura noh.
Lah ban kdew hangne ba ki la don bun ki mat ba katei ka kynhun jong ki 8 ngut ki MLA ka UDP ki pynsngew ha ka jingkynduh ïa ki nongïalam ka BJP ha Nongbah Delhi. Katto katne ki kynthup ïa ka jingdawa ban ai jingithuh noh ïa ka Ktien Khasi ha ka Khyrnit kaba Phra jong ka Riti Synshar jong ka Ri, nangta ban pyntreikam ïa ka MRSSA bad bun kiwei kiwei pat.
Halor ka jingkylli la ka la don neem ka jingïakren na ka bynta ka bhah shuki Myntri ha ka Sorkar Jylla, ym shym la ïoh satia ïa ka jubab kaba shai.
Tangba haduh mynta hi, ki tyllong khubor ki ong ba na ka liang ki MLA ki kloi ban leit pynïasoh noh lada ka Sorkar Pdeng ka pdiang bad mynjur ïa kitei ki mat kiba kongsan tam kiba ka Jylla ka angnud ba kin urlong noh.
