Lada ki nongmihkhmat ki leit ban pynïasoh noh sha kiwei pat ki seng saiñ hima: Ka Sur u Paidbah UDP

Jowai, Nailur 20: Wat hapdeng ka Hamsaia ba bun ki MLA ka United Democratic Party (UDP) ki ban leit pynïasoh ïalade sha kiwei pat ki Party, hynrei pat haka jingïalang jong ka UDP Jowai Circle kaba la khot da u ma Marki Mulieh uba long u President ka 2 L/A Jowai Circle West Jaiñtia Hills District kaba la long hynnin ka sngi 19/9/2026, ha Tpep-Pale, Jowai kumba khat-ar spah ngut eiei ki Nongkyrshan jong ka United Democratic Party (UDP) ki la wan sha kane ka jingïalang bad ka Sur ki Paidbah kiba wan sha kane ka jingïalang ka long “LADA KI NONGMIHKHMAT KIBAN LEIT PYNÏASOH SHA KIWEI PAT KI PARTY KATA KA DEI KA KAM SHIMET JONG KI YM KA PARTY UDP”.
Ha kane ka jingïalang kaba la khot kyrpang da u President ka 2 Jowai Circle UDP West Jaiñtia Hills District ma Marki Mulieh kaba long kum shibynta ka jingpynkhreh na ka bynta ka Elekshon Shiteng Samoi jong ka Shillong Parliamentary Seat kaba la sah thylli da ka jingkhlad khlem pat dei por jong u Dr. Ricky A.J Syngkon.
Ha kane ka jingïalang la wan ïashim bynta lang da u ma Nujorki Sungoh MLA, bah Titostarwel Chyne Ex. CEM( KHADC) uba long ruh u State General Secretary ka United Democratic Party (UDP) Meghalaya, u bah Vivan G.K. Kynta uba long ruh u Kyrtong MP Elekshon shiteng Samoi, Shillong Parliamentary Constituency, ma Wilan Dkhar State Vice President UDP Meghalaya, bah Metbah Lyngdoh State President UDP & Minister Government of Meghalaya bad kiwei de ki riewkhmat bad ki Nongkyrshan ka Party UDP ka 2 Jowai Assembly Constituency.
U bah Vivan G.K. Kynta uba long u Kyrtong (Candidate) MP By Election Shillong Parliamentary Constituency, haba kren ha kane ka sngi hadien ba u la pdiang ia ka jingjied jong ka Party United Democratic Party (UDP) kum u Kyrtong jong ka Party UDP, u Apeal ïa ki paidbah Nongthep Votes ka 2 Jowai Legislative Assembly Constituency ba kin ai ka jingkyrshan jong ki ba un long u MP jong ki ha kane ka Elekshon shiteng Samoi ha ka juh ka por u Apeal ïa ki Nongkyrshan jong ka Party UDP ba kin nangiai trei shitom bad nangkhot shuh shuh ia ki paradoh parasnam ki bym pat long ki dkhot jong ka Party UDP ba kin kyrshan ïa u bad da ka jingkyrshan jong ki un wan ha ka jingjop bad lada un wan ha ka jingjop bad ïa kaei kaba ka jaitbynriew ka dawa un shimkhia bad un kren hapoh ka Dorbar Parliament.
U bah Metbah Lyngdoh, State President ka Party UDP, haba kren ha kane ka sngi, u pynpaw ka jingkmen ka bakhraw ba hapdeng ka Hamsaia ba ki katto katne ngut ki MLA kiba la jop na ka Tiket UDP ki kwah ban leit pynïasoh sha kiwei pat ki Party, u kyrshan ïa ka sur ki paidbah kaba ong “Lada don shisha ki Nongmihkhmat jong ngi kiba la jop na ka Party UDP bad kiba kwah ban leit pynïasoh sha kiwei pat ki Party kata ka dei ka kam shimet jong ki ym ka Party” bad u pynpaw ïa ka jingkmen bad ka jingwan ki paidbah ka 2 Jowai Circle da ki spah ngut sha kane ka jingïalang kaba la pyndap smam ïa ka Hall bad shabar ka ai mynsiem ïa u bad ïa ka Party UDP ba kan nangïaiskhem bad ïai imsngi ban shakri ïa ka Jaitbynriew bad ïa ki nongshong shnong jong ka Jylla Meghalaya baroh kawei.
Shuh shuh u bah Metbah Lyngdoh nalor ba u pan ïa ka jingkyrshan ki paidbah ïa u bah Vivan G.K .Kynta, u Kyrtong jong ka Party ha kane ka Elekshon shiteng Samoi (By Election) sha ka ïingdorbah jong ka Ri India (Parliament) ba kin ai ka jingkyrshan ba un wan ha ka jingjop bad kum u Nongïasaid Aiñ u bym ju shahrem ha kano kano ka Case un shimkhia ban ïasaid na ka bynta ka mynta bad ka lawei jong ka jaitbynriew U Hynñiewtrep u Hynñiew Wasa.
Kiwei de kiba ai jingkren ha kane ka sngi kynthup ïa u ma Nujorki Sungoh MLA, ma Wilan Dkhar, bah Titoswestar Chyne.Baroh ki Nongkren ki kyntu bad appeal ïa ki paidbah ka 2 Jowai L/A/ Circle bad ïa ki Nongshong shnong jong ka West bad East Jaiñtia Hills ba kin ai ka jingkyrshan kaba pura ïa u bah Vivan G.K. Kynta wat lada ïa ka tarik ym pat pynbna ka Elekshon Commission lano yn pynlong ïa kane ka elekshon shiteng samoi jong ka Shillong Parliamentary Constituency.
Kane ka jingïalang paidbah ka shulong tang kum ka jingpynithuh paidbah ïa u Bah Vivan G.K. Kynta, u Kyrtong jong ka Party UDP bad ynda la pynbna ïa ka tarik ban long ka elekshon, yn leit pynsngew paidbah ha man la ki shnong ki thaw jong ka 36 L/A Constituency jong ka Shillong Parliament Constituency ong ki Nongkitkam jong ka Party UDP.
Ïa ka jingïalang la pynïaid da u ma Marki Mulieh, President ka 2-Legislative Assembly Jowai Circle ( 2-L/A Jowai Circle) UDP West Jaintia Hills District bad kyntang ïawai ïa ka jingkren ai khublei la ai da ka kong Bhalang Lato, Women Wing 2-L/A/Jowai UDP Circle.