Ym lei lei lada rem noh ha ka elekshon 2028 tangba la urlong ka jingangnud ki paidbah: MLA Mawphlang

By Mawphor Editor On Sep 21, 2026

Shillong, Nailur 20 : U MLA jong ka UDP na Mawphlang, u Bah Matthew Beyondstar Kurbah, u la pynskhem ïa ka rai jong u ban leit sha ka Bharatiya Janata Party (BJP), da kaba ong ba ka nongrim jong kane ka rai ka long ban ïoh ïa ka roi ka par kaba kham bha na bynta ka constituency jong u.
U la ong ruh ba u long uba la kloi ban mad ïa ka jingshah rem ha ka election ha u snem 2028, lada kaei ka rai kaba u shim ka dei pat na ka bynta ban pynim bad pynmyntoi ïa ki paidbah bad ïa ka Jylla hi baroh kawei.
Haba kren ha ka jingïalang bad ki nongkyrshan jong u dang shen une u MLA u la ong ba ka jingwan jong ki paidbah ha ka jingïalang hi ka la pyni shai ïa ka jingkyrshan jong ki ïa ka rai jong u.
Shuh shuh u la ong ba lada ka BJP ka pyndep ïa ki jingkular kiba la ïakren, um don kano kano ka jingpyrkhat arsien ban ïatreilang bad ka party.
“Ka daw kaba pynbor ïa nga ban leit sha BJP ka long namar ka roi ka par jong ka constituency. Ka jingtrei ïa ki pynroi hangne ka dang duna bha. Naduh u snem 2023 nga la ap ba ka roi ka par kan poi sha ka constituency, hynrei mynta la palat lai snem bad nga dang ïohi ba ym don jingkyrmen,” u la ong.
Haba kren halor ki jingkynnoh ba ka BJP ka long pyrshah ïa ki Khristan, u MLA u la kyntait ïa kine ki jingkynnoh, da kaba ong ba ki long tang ki jingpynkulmar ïa ki paidbah.
“Kine baroh ki long tang ka jingpynkulmar ïa ki paidbah. Ha ka constituency Mawphlang don ki briew kiba don ha ki niam bapher bapher, kynthup ïa ki Seng Khasi bad ki kynhun Khristan bapher bapher. Ngam pat ju ïohsngew ba kiba long Seng Khasi kin khang ïa ki Khristan ban leit sha ïingmane, ne ba ki Khristan kin pyrshah ïa ka niam Khasi,” u la ong.
U la ong ruh ba ka jingdon hapoh ka party kan ai ïa u bad kiwei kiba ïeng na bynta ka constituency ka lad ban kren shai bad ban ïada ïa ki jingmyntoi jong ka imlang sahlang.
“Ym don jingpyrkhat arsien ban leit sha BJP, namar kane kan ym ktah ïa ka niam. Lada ngi don hapoh BJP, ngin ïoh ïa ka lad ban kren. Lada ka BJP ka pyrshang ban leh ïa kano kano ka kam pyrshah ïa ki Khristan, lada ngi don hapoh, ngin don ka bor ban kren pyrshah ïa kiba pyrshang ban leh bakla. Hynrei lada ngi don shabar, ngi lah tang ban shu shong ïakhih pyrshah,” la ong.
Haba pynskhem biang ïa ka nongrim jong u, u MLA u la ong ba ka jingjop ne jingshah rem ha ka election kam long kaba kongsan lada ka kam kaba u leh ka dei pat na bynta ka imlang sahlang.