Shillong, Risaw 29 : Ki bos STEM ( Sustainable Transport and Efficient Mobility Society) ba ka sorkar Meghalaya ka wanrah na bynta ban leit buh bad shaw skul kylleng ka nongbah Shillong, ka la khur ïa ka khusnam, ‘City with the Best Record of Public Involvement in its
Transport Planning’ na bynta ka projek ‘Shared Commuter Service in East Khasi Hills (Shillong)’ ha ka jingrakhe ïa ka 16th Urban Mobility India Conference and Expo 2023 kaba long ha Nongbah Delhi naduh ka 27 haduh ka 29tarik mynta u bnai.
Ïa katei ka khusnam la aiti da u Secretary ka tnad Housing bad Urban Affairs ka sorkar pdeng, u Manoj Joshi ha ka Secretary jong ka sorkar jylla ba dei ruh ka CEO jong ka STEMS, Kong I Laloo ryngkat ka jingdonlang ki heh ka STEMS.
Kiwei pat ki sor kiba khur lang ïa katei ka khusnam ha ki thup bapher bapher ki kynthup ïa ka Delhi, Lucknow, Srinagar, Bhubaneswar, Kochi bad Jabalpur.
Lah ban kdew hangne ba kane kadei ka jingithuh kaba nyngkong ba ka STEMS kan ïoh na ka sorkar pdeng naduh ba la pyntreikam ia ka ha u snem 2021 da ka Planning Department jong ka sorkar jylla. Kitei ki bos STEMS ki la sdang mih pyrthei ha u 2023 haien ba ka sorkar jylla ka la pyllait paidbah 30 tylli ki bos skul ban don ha kylleng ki bynta ba kongsan jong ka nongbah.
Ha kitei ki bos la pyndait ruh naduh ki kor CCTV, GPS ban pynsuk ïa ki kmie ki kpa ban buddien bad ruh ha man ki bor la buh da ki nongbud bad nongniah kiba tbit ïa kaba la leh da ka jingïasyllok lang kaba bunsien bad ki paidbah bad ki tnad sorkar.
Ka jingpyntreikam ïa ka STEMS ka la urlong da ka jingïatrei lang bad ka Meghalaya Transport Corporation, NIC Meghalaya bad ka NIC Uttarakhand, ryngkat ka jingïatrei ryngkat ryngkat bad ka Shillong Traffic Police bad Public Works Department (Roads).
Kum ka jingsdang, ïa kitei ki bos la pyrshang shwa ha ki 15 tylli ki skul ba don ha ka nongbah.
