Ka jingkynthoh bad jingbishar halor ka Phlim Khasi “NONGSHUN”

Shillong, Risaw 29 : Ha ka pyrthei jong ki phlim Khasi, ka kyrteng jong u Kamki Diengdoh bad u Elizer Bareh kim dei shuh kiba thymmai namar jan baroh ki la ju ïohsngew bad tip shaphang jongki.
Ki phlim jongki ki long kiba kham pher, kiba ksam ïa ka jingmut jingpyrkhat jong ki nongpeit phlim, kiba don hala ki jong ki phang lane ki “genre.”
Ka phlim “NONGSHUN” watla ka dei tang ka phlim lyngkot kaba kine ki arngut ki samla rangbah ki la thmu ban pyni ha ki film festival, kum ha ka Kelvin Cinema Festival, (ka ban sa long naduh ka 9 haduh ka 11 tarik u Naiwieng 2023) ka dei ka nuksa jong ka jingjylliew ka jingpyrkhat haba ki thaw bad pynkhreh ïa ka phlim, “NONGSHUN.”
Ha kaba sdang jong ka phlim, ngi ïohi ïa arngut shi kurim, kata u Rick (Elizer Bareh) bad ka Divya (Eva Mary Swer) kiba ap khmih lynti ïa i khunlung jong ki, i ban sa wan sha kane ka pyrthei.
Hynrei, ka jingim jong ki ka la kylla noh bak-ly-bak tang namar ka jingwan lap jong u nongshun, uba la buddien bad kthong ïa u Rick la slem bah.
Uta u nongshun udei u Shngaiñ (Albert Mawrie) uba u Rick u ju ïatrei lang ha ki kam dawa pisa na ki heh saipan, kumjuh ruh ban byrngem byrsit, ban pyntieng pynsmiej ïa ki nongkhaïi khnang ban ïoh ka jingkyrshan pisa na ki.
Ka la mih ka jingïa pher jingmut hapdeng jong ki arngut bad u Rick ula ïaid noh la ka jong ka lynti; ula ieh noh shisyndon ïa ka kam lehnoh, naduh ba ula ïakynduh bad ka Divya.
U Rick um kwah shuh ban long u riewsniew namar ula rai ban im ka jingim kaba shisur ryngkat bad ka baieid jongu, ka Divya.
U Shngaiñ pat ha kawei ka liang, u dang buh sni ïa u Rick, ban ai jingsneng ïa u bad ha kajuh ka por ban ïoh biang ïa ka bhah kaba ki la ïakut ban ïa sam hapdeng jong ki.
Namar ba u dei u snar kaikhlaw, um pyrkhat arsien wat ban shim ïa ka jingim briew tang ban ïoh ïa kaei kaba u kwah.Kumta ula rahbor ïa ka Divya.
\ U Rick ula dum ka buit ka stad, namar um shym la poi pyrkhat ba kum kane ka apot kan wan jia ha u; ba ki riewsniew kin knieh noh ïa ka baieid jong u.
Dei ha kane ka por ba la wan u Phrang (Hilarious Kharbihkhiew), u heh pulit uba ïajan lok bha bad u Rick bad ka dei na u hi ba u Rick un sa tip ba ïa ka Divya la rahbor da u Shngaiñ.
Lada phi kwah ban tip shuh shuh kaei kaba jia ha kane ka phlim, bad la u Rick u la lah ne em ban pyllait ïa ka baieid jong u na ki tyrsim jong u Shngaiñ, phi hap ban peit hi dalade ïa ka phlim “Nongshun.”
Haba ki don ki tyngshop kiba tbit kum u Albert bad u Elizer, phin ym pep ban khmih lynti ba ka phlim kan long kaba itynnad.
Shuh shuh, ka jingai bynta ïa u Hilarious (phi kynmaw ka phlim “Jeff”) kum u heh pulit ka long ka sienjam kaba biang por na ka liang jong ka State of Mind Productions.
Ka puron Eva (Divya) ka dei ban ïoh ka jingïaroh halor ka jingshlur bad kumjuh ruh ka jingtbit jong ka ban pyndep pura ïa ka bynta ba la bynshet ha ka.
Watla kam dei ka sien kaba nyngkong ïa u Mathew ban ïa don bynta ha ki phlim Khasi, ha kane ka kynti, ngi lah ban ïohi ïa ka sap jong u.
Ngam lah ban mynjur shispah na ka shispah ïa ka music, ban pynïahap ha kane ka phlim, (dang lah ban kham pynbang shuh shuh) hynrei kaba shoh bad kaba pynum mynsiem bha, ka long ka jingkhleh ïa ki sur, lane ka fusion, hapdeng ki jingtem tynrai bad ki jingtem phareng.
Ka jingïaroh ka leit sha u Ribor, kum u Music Director.
U Julius um shym la pynsepei ïa ka sap jongu, khamtam namar udei u rangbah uba la shemphang bha ha kane ka liang.
“Nongshun,” ka dei ka phlim kaba ngam pat dap ban peitkai. Kane ka action film kam pat dei ban kut noh hangto, hynrei namar ba ka dei kata ka “short film” ym banse ban shu hun noh kumto ha ryngkat ka jingkyrmen ba ka State of Mind Productions kan dang bteng ïa kane ka jingïathuh khana.