Nongpoh, Rymphang 09: Na ka bynta ban ïaid beit ïaid ryntih ka jingpynkhreh ïa ka election 2023 hapoh ka jylla bad ruh ba kan nym don kano kano kaba ktah ïa ka shongsuk shongsain ha ka election jied nongmihkhmat kaba long ha ka 27 tarik u Rymphang 2023 ha ka jylla, ki nongpeit pyrman na ka Election Commission of India ki la wan poi ha Ri Bhoi District ba kin long kum kita ki nongpeit pyrman ban ïaid beit ïaid ryntih kane ka election jied nongmihkhmat na Ri Bhoi District.
Katkum ka kyrwoh ba la pynlait da u Deputy Commissioner ka Ri Bhoi bad uba dei ruh u District Election Officer ka Ri Bhoi, la ong ba ki nongpeit pyrman (Observer) na ka Election Commissioner ka India ki la wan poi mynta ha Ri Bhoi District bad mynta ki la leit shong shipor ha ha North East Police Academy (NEPA) shuwa ba kin pyndep ïa la ka kamram kumba la bynshet da ka Election Commission ka ri India.
Ka kyrwoh na u deputy commissioner ka Ri Bhoi ka la pyntip ruh ba ki paidbah ki lah ruh ban ujor sha kine ki nongpeit pyrman ïa ka election lada don kino kino kiba pynkheiñ ïa ka Model Code of Conduct da kaba phone sha ki ban pyntip ïa kaei kaba ki thmu ban ujor halor ki kam ba pynkheiñ ïa ki kyndon aiñ ka election.
U K. Veera Raghava Roa, IAS, u dei u nongpeit pyrman na ka bynta ka 9-Nongpoh AC bad 10 Jirang AC ki lah ban phone ha une u number 9863063378,u Narendra Kurmar Dugga u dei nongpeit pyrman na ka bynta ka 8 Mawhati AC, 11 Umsning AC bad 12 Umroi AC bad ki lah ban phone ha une u number 9366809553.
Na ka liang ki Police observer, u Ranjit Kumar Mishra, IPS ki lah ban phone ha une u number 7005772049 uba ban peit ïa baroh ki Constituency ha Ri Bhoi bad shuh shuh u Expenditure Observer, u dei u Ashish Kumar, IRS da kaba phone ha une u number- 6009610360 bad u Ashish Kumar Pandey u ban peit pyrman ïa ka 8-Mawhati AC, 9-Nongpoh AC bad 10-Jirang AC ba ki paidbah ki lah ban phone ha une u nymber 6009629644.
Shuh shuh, la pyntip ruh kitei ki nongpeit pyrman ki la sdang ban treikam ïa la ka kamram ba la bynshet da ka election commission ka India bad kine kin long kita ki nongpeit pyrman na ka bynta ban ïaid beit ïaid ryntih ka election ka ban long ha ka 27 tarik u Rymphang 2023 bad kino kino kiba pynkheiñ ïa ka kyndon jong ka Model Code of Conduct kin shah pynshitom katkum ki kyndon ka aiñ, ong ka kywroh na u District Election Officer ka Ri Bhoi.
