Jowai, Rymphang 09: Ki pulit jong ka West Jaiñtia Hills District mynta ka sngi kila ïoh ban kurup haduh 13 tylli ki khop sabom (Heroin) kiba khia kumba 152 gms ba shong dor haduh 76 lak tyngka.
Ka jingïoh kem ki pulit ïa une u kynja jingdih pynbuaid hadien ka jingsuba jur ba don ka jingthmu ban khaïi tuh ïa u shapoh ka District bad mar mar ki pulit kila pynlong ïa ka jingap pahara naduh ka por 1 waje jong ka step phyrngap. Na ka liang ki pulit kiba ïoh ban bat syndon ïa ar tylli ki kali ha ki bynta ka Raliang OP bad hadien ka jingtalasi la ïoh kurup ïa utei u Drug bad la kem ïa saw ngut ki briew 3 ngut ki shynrang bad kawei ka longkmie ryngkat lai tylli ki Mobile Phone, ka pisa ba 52,550 tyngka.
Katba ïa utei u jingdih pynbuaid la lap na kawei ka kali kaba don ïa u Number na Assam ha ki bynta ba la buhrieh bha ïa u bad ki pulit kila pynshisha ba dei u kynja jingdih (Heroin).
Halor kane ki pulit kila kem ïa kitei kiba don kti la register kes da kaba pynngad kyndon hapoh NDPS Act bad ka jingtohkit ïa ki ka dang ïaid shaphrang.
