Shillong, Risaw 22 : Ka Committee kaba la thung da ka Meghalaya Cricket Association (MCA) kaban khmih bad ban jurip bniah ïa ka kam kaba ïadei bad ka jinghap ban khot ne shim ïa ki rang ïalehkai na shabar jong ka jylla ban mihkhmat ha kane ka samoi ïalehkai kaba mynta jong ka BCCI, ka la aiti ïa ka kaiphod sha u Hony Secretary ka Meghalaya Cricket Association.
Katkum ka kaiphod la ïoh jingtip ba kane ka committee ka la ai jingmut ba kan shah ne ailad ïa ki phra ngut ki rang ïalehkai ba kin mihkhmat ïa ka Meghalaya.
Dang ha u bnai uba la dep, ka la don ka jingujor pyrshah ha kaba ïadei bad ka jingïohlad ki kato katne ki rang ïalehkai ha ka kyrdan jong ka Senior Men’s U-23, kaba pynlong mar mar ïa ka MCA ba kan shim ïa ka sienjam da kaba thung ïa ka committee jong ki lai ngut ki dkhot kaba kynthup ïa vice-president Rayonald Kharkamni bad sa arngut ki dkhot ka Apex Council kata u Bah Arwotki Sumer bad u Sengnab Momin ba kin khmih bniah halor jong kane.
Hadien ba la bishar bniah ïa ki kot ki sla ba donkam naduh ki birth certificate, Aadhaar card bad ruh ki card thep vote, kane ka committee ka la sngewdei ba kan shah bad plie lad ïa ki 8 ngut ki rang ïalehkai kiba nabar jylla ba kynthup ïa u Jaskirat Singh Sachdeva, Arpit Bhatewara (Senior Men’s team), Rohit Kumar Yadav, Raghav Kumar Magotra, PM Santosh, Kevin Sanjeev Christopher, Abhishek Kumar bad Sachin Kumar (baroh ha ka thup U-23 Men’s team) ba ki lah ban mihkhmat ïa ka Meghalaya ha kane ka samoi ïalehkai kaba mynta.
Katba arngut ki player ba kynthup ïa u Sachin Kumar bad Rohit Kumar Yadav, ki la ïoh shwa ban pdiang tang ïa ka provisional clearance da kane ka committee bad ba ki donkam ban aiti ïa ki school certificate bad residential certificate shwa ban shah ne ailad ïa ki ban mihkhmat ïa ka jylla.
Shuh shuh kane ka committee ka la shim ruh ïa ka rai ba u Banïalam Mylliemngap u bym shym la lah ban pynrung ha ka thup ka kynhun ïalehkai jong ka 23 Men’s team lehse yn lah ban pdiang ne mynjur ïa ka jingjied biang pat ïa u kaban shong ha ka jinglah ka jong u ban koit noh na ka jingshitom bad ban da ïoh ïa ka fitness clearance na ka kynhun jong ki physiotherapist.
Sa kawei pat ka jingai jingmut jong kane ka committee ka long ba nangne shakhmat ka MCA ka dei ba kan kyntu ïa baroh ki synjuk ïalehkai kriket ba don ha kane ka jylla ba kin da pyntikna ïa ki kot ki sla kiba donkam jong ki nongïalehkai ha shawa ba kin aiti pat sha ka MCA, kaba long kat kum ka kyndon ba la kdew da ka BCCI.
Ka jingai jingmut ba khatduh na kane ka committee ka long ba ka MCA ka donkam ba kan thung ïa uwei u nongjied player (selector) naka na ka kynhun jong ka Senior Men Selection Committee kaba donkam ba un da don beit markhmat ha ki por ba ka kynhun ïalehkai ka jylla ka ïakhun ha la iing ne shabar na la iing, khnang ba un ïoh ïa ka lad ba un khmih bad jurip bniah ïa ka jinglong ka jingman bad ka rukom ïalehkai ki nongïalehkai ha ki jingïakhun kiba dang sah jong ka Ranji Trophy 2024-25.
Hadien ba la ïoh ïa ka jingai jingmut na kane ka committee, ka Senior Men Selection Committee jong ka MCA ka la lah pat mynta ba kan pynrung ïa ka kyrteng jong u Arpit Bhatewara sha ka thup ïalehkai kaba 15 ngut jong ka jylla kaban dang bteng ban ïakhun ïa ki jingïalehkai kiba dang sah ka Ranji Trophy 2024-25. Katba ka kyrteng u Jaskirat Singh Sachdeva la dep lypa ban pynrung naduh kaba sdang bad uba dei tang ma u ba la lah ban kamai bun ron ha ka jingïakhun kaba dang shu dep bad ka Tripura.
Ka jingïakhun kaba bud ïa ka Meghalaya ha ka Ranji Trophy kan dei pyrshah ïa ka Maharashtra kaban long ha Aurangabad naduh ka 26 tarik mynta u bnai bad hadien kane, kan wanphai biang sha laiing ban ïakhun pyrshah ïa ka Jammu & Kashmir kaban sdang naduh ka 06 tarik Naiwieng.
Kine harum ki long ki kyrteng ba pura jong ka kynhun ïalehkai Ranji Trophy ba mynta ka samoi ka MCA: Aryan Borah, Akash Kumar Choudhary, Bamanbha Shangpliang, Bijon Dey, Chengkham Sangma, Dippu Sangma (VC), Jaskirat Singh Sachdeva, Kishan Lyngdoh (C), Ram Gurung, Roshan Warbah, Lerry G Sangma, Arpit Bhatewara (WK), Ajay Duhan (BCCI approved guest player), Sumit Kumar (BCCI approved guest player), Anirudh B (BCCI approved guest player)
Nongïalehkai pynap : Aadarsh Joshi, Anish Charak, Wanlambok Nongkhlaw, Shembhalang Pyngrope, Arien B Sangma
Ki nongïarap jong ka kynhun : Prabhakar Bairgond (Head Coach), Moisten Ch Marak (Assistant Coach), Surojit Biswas (Physio), Vikash Singh Chauhan (Trainer), Dister Marbaniang (Manager)
