Thaw rekod u rangïalehkai Nongkseh, ha ka rta ba dang 15 snem ïoh pynkhih jar ha lympung SSA 1st Division

Shillong, Risaw 22 : Watla ka lympung ïalehkai jong ka SSA 1st Division League ka dang shu sdang shen hynrei ka Nongkseh Sports Social & Cultural Club ka la ïoh ban thaw ïa ka rekod kaba nyngkong eh ha katei ka lympung hadien ba u rangthep kol jong ka, u Imingstar Mawlong u la kylla long u rangthep kol ba khynnah tam ban ïoh pynkhih jar ha katei ka lympung tang ha ka rta kaba 15 snem.
Ïa kane ka rekod la pyntikna ruh da u General Secretary jong ka Shillong Sports Association u Dipshon L Nongbri.
Khyndiat shaphang une u rangthep kol , u Imingstar u dei u ba dang pule ha ka klas 9 ha Air Force Public School, Laitkor.
Katei ka kol kaba u thep ha ka jingïakhun pyrshah ïa ka Mylliem Sports Club ka kylla long ruh ka kol kaba pynjop ïa ka Nongkseh ha ka jingïalehkai kaba long ha ka Sngi Nyngkong da 2-1 kol kaba pynlogn ïa ka ban khur suk ïa ki lai point.
Ban paw kyrteng kum u nongthep kol ha ka First Division ka dei ka jingjop kaba khraw bha khamtam lei ban thaw syndon ïa ka record kum u nongthep kol ba dang 15 snem, ka record ba ju bat da ki rang ïalehkai kiba la kynjoh ïa ka 19-20 snem ka rta.
La ïathuh ruh ba ïa ka sap ïalehkai jong u Imingstar la shem nyngkong da u President ka Nongkseh SS&CC Bah Daniel Thangkhiew ha ka jingïalehkai phainal jong ka Meghalaya Youth League. U President Bah Daniel M Thangkhiew ula ong, “Ha ka khyllipmat ba u ktah bad bat ïa ka bol, hangto hi nga la rai ba ngi hap ban shim bad soi ïa u bad ka Nongkseh”.
Katkum ka jingïathuh da u General Secretary ka Club, Bah Marbiang Thangkhiew la ong ba shwa ban soi ïa u sha ka Nongkseh, ki la hap ban ïakhun tyngeh namar ki hap ban pan jingbit ym tang na ki Kmie Kpa jong u hynrei wat na ka skul ba kan shah ïa u ban wan sha ki lympung kilan met bad ïashimbynta ha ki jingïakhun.