Ka por ban khroh ïa ki briew mynta ka la sdang, ka por ba ka ïaid ba ïeng ba duk ba riewspah ba kynthem ba kynjai, ki shu shah rah kti rah kjat, shu ïa shah pajut kti, ka kali kaba ïaid ka sangeh kynsan skhek, ban ïarap ban kit ban bah ïa ki ba ïaid kjat ha ki lynti ki syngkien, ynnai ïakren lei lei ïa ki ïing ba wan jia ka ïap ka duh, ki jingdonkam ki shu wan poi hi katba ki trai ïing ki dang phohsniew.
Kane ka por khroh mynta ka la sdang ba kan jur bha, namar kumba ïa tip ba ka jylla ym slem ba kan leit sha ka jingjied ïa ka nongmih khmat sha ka iing dorbar thawain, kaba haduh mynta mynne ym pat lah ban ïa sngewthuh lano bad mynno kan long kata ka elekshon.
Hynrei u paidbah u donkam ban long uba husiar bad uba shalak, da lei lei un nym lah ba un ngop ha kum kine ki buit pah ki buit phoh jong kita ki kyrtong, namar mynta ba dang dei ka por ban khroh, kine ki ïai wan ba kin mihpaw, lada ki kyrtong kim lap, ki nongbud ba ïajan eh bad u, ki pynïeng ïala ka jong ka shkor, ki tur kat shaba iohsngew ban lam khmat ban balaiñ talaiñ nakhmat nakhmat, ban ïaleh ban kdup shwa ba lap ba ioh wan rong noh kiwei, namar ha kum kane ka por, na uwei u tnum ïing, lada lah ban khroh briew lada sien ïaki lah ban kha roi pat kham bun ngut.
Hynrei ka jingeh kaba ju ïa shem bad iohi ïa kaei kaba la jia ïa ki paidbah ka long, ba shisien ba ki la shah khroh shah pah, khamtam lei lei haba la shah pynkham ki lut tyngka, da lei lei kim juh nud shuh ban kylla dien, pynban kata ka mynsiem ïa tip lem kam shah ïa ki, kampher lada uta u briew ba wan ban ïarap um pat da biang palat, hynrei la shu jied matlah shisha pat ïa u namar ba u la wan ban ïarap ha ka por ba la mad ïa ka jingeh.
Da shisha, haba mad ïa ka jingeh bad lada don ba wan ïarap ban ai kti kamon ka kti kadiang ka mynsiem briew kam lah ban khlem da pyrto ban pyrshang katba lah ban siew kylliang, kampher wat lada ym lah lut baroh, hynrei katba don ei la ka bor, hynrei ha ka khep ban hap ban jied ïa ki kum ki nongmih khmat, la donkam shisha ban pyndonkam ïa ka bor sngewthuh bad ba shemphang shisha na lade shimet.
Hynrei kiba kham shah pah shah phoh eh ha kum kine ki por ba mynta dei shisha kito kiba kham li-li-pen-pen, kiba shim kabu bha ïa kum kane ka por, ba man la ka thliew ïing jong u kyrtong uba thmu ba un ïakhun, la sdang ban ïa lum bad boi ban ud ban nam ïa la ki jong ki jingeh, kaba nangne shakhmat, ki jait bai kiba har rukom ki wan ba kin mihpaw, katno tam lei lei ha kiba kham don ha ki ïa ka sap ban nang bha ban ud ban nam, ban kham kren ïa ki kyntien ba myllung ban pynsngew lung ïa ka mynsiem ki bapli jong ki kyrtong, kiba sei la ka sei nala ka jong ka pla ban pynkham ïa ki har rukom ki rong jong ki lut tyngka.
Nalor kata, kum kine ki jait briew kim salia ban leit ban kyntiap na kawei ka ïing u kyrtong sha uwei pat, namar ha ki, kata ka raiñ ka rem ne ka mynsiem ïa tip lem kam don shuh ha ki, kim salia hynrei puk puk ki rung ki mih ki leh sngewthuh namar ka dei ka por ïa ki ban shu bam jem.
Dei haba kham bun than eh kum kine ki mynsiem, ba kata ka kyntien jingong ban ïaleh ïa ka elekshon khlem don ka tyngka ka long kaba eh bha ha kum kane ka juk bad ki por ba mynta, namar ha kum kane ka por, u kyrtong ruh u lah ban jop lada u khlaiñ bha ka bor pisa ha u, namar katba u dang lah ban ïai theh, katta u dang lah ban khroh ban pah ne ban rong ïa ki sha la ka jong ka sem jong u.
Haba u la jop pat, um salia ban peit shuh ka khmat ïa ki paidbah, namar kum u kyrtong u la dep lypa ban thied ïa ki naduh kaba sdang bad ha kum kine ki khep, ki san snem ki shu kylla long tang ki snem kiba u kyrtong un pyrshang katba lah ban khyllie lut ïa ka spah bah kaba u la theh bad pynlut ha ka por ba u dang ïeng ban ïakhun, haba u la jop bad sdang ban jah na u paidbah, mano pat ba hap ban ïa ïam rem, dei pat u paidbah, namar ka roi ka par ne ki ta ki skhim pynroi ïa ki shong ki thaw kim wan mih paw satia, namar ba u kyrtong uba la jop u la jah rngai noh khlem iohi syrngiew shuh syndon ïa u.
Da shisha don ruh pat ki longïing kiba da mad shisha ïa ka jynjar trah ha ka jingim, kaba tang na phalor ruh la ithuh ba ki long kiba da donkam shisha ban kner ïa ki kti ki jong ki, katno tam lei lei haba wan ban ban ka pang ka shitom, da I syrtok bad paitdohnud shisha ïa ka rympei ïing ka jong ki ban peit, namar ba kata ka jingeh ba la mad ha ka jingim ka kham long kaba palat liam ban ïa kiwei pat.
Ïa kum kine ki longïing, da shisha ban ïarap ruh kam don jingïapher, namar da ithuh bad pawshai kata ka jingeh ba wan lyngshop ha ka jingim ka jong ki, hynrei bunsien kum kine ki briew ha kum kane ka por kham ñiar kiban iohi ne shem ïa ki, namar hapdeng ka jynjar bah kaba wan ban lyngshop, kim tip shuh shano ban wad ïa kita ki lad jingïarap, hynrei kaba kut ki rai kut ha la ka jong ka mynsiem ba long kaba ka long ban ïai ap ïa ka jingkylla jong ka por.
Kumta ban lah ban wanrah ia ka jingkylla ha ka liang ka saiñ hima sima ha kane ka jylla, u paidbah u dei ban long uba stad u ban kiar na ka khwan myntoi shimet, hynrei ban nang ban jied ïa ki kyrtong kiba ieng ban iakhun, klet shisha ïa ka myntoi ba shimet, hynrei long uba kloi ban pyrkhat ïa ka myntoi uba bun balang, ai jingsneng ruh ïa kito ki briew kiba thmu ban pynjop da ka tyngka, namar lymda lah ban kylla mynta, ka jylla hi da lei lei kan nym lah ban poi shano shano ruh.
