Khur jingjop ka Friends United CC bad ka Cricket Lovers CC

Shillong, Rymphang 16 : Ka Friends United CC bad ka Cricket Lovers CC ki la khur ïa ka jingjop ha ka lympung ïalehkai 2nd District League T20 Cricket Tournament 2023 ba pynïaid da ka East Khasi Hills Cricket Association ha ka jingïalehkai ha ka sngi Palei ha Shortimai Syiem Stadium, Smit.
Ka Friends United CC ka la khur jingjop da kaba pynliem da 10 ron pyrshah ïa ka Marbisu CC katba ka Cricket Lovers CC ka la pynliem ïa ka Pomshutia CC da 44 ron.
Haba phai sha ka jingïalehkai kaba nyngkong, ka Marbisu CC kaba la jop ïa ka jingkynting pisa ka la ailad tied nyngkong ïa ka Friends United CC ha kaba ka la kamai 118 ron duh noh 5 wicket ha baroh ki 20 over. U Nangkiewkor Moore Don udei u rangtied bol ba kamai bun ron na ka bynta ka Friends United CC u kamai 34 ron na ki 40 bol. U Richard Collin Diengdoh u ïoh 1 wicket ai kamai 22 ron ha ki 4 over.
Ka Marbisu CC haba beh ïa katei ka thong ka la kamai tang 108 ron khyllem noh 9 wicket ha baroh ki 20 over bad dei tang u Fervent Rymbai uba kamai bun ron da 25 ron na ki 35 bol bad u Ernestin Kyntiewbor Swer marwei u ïoh khur 3 wicket ai kamai 23 ron ha ki 4 over. Ïa ka nam Player of the Match la ïoh da u Nangkiewkor Moore Don.
Ha ka jingïalehkai kaba ar hapdeng ka Cricket Lovers CC pyrshah ïa ka Pomshutia CC, ka Cricket Lovers CC kaba la jop ïa ka jingkynting pisa ka la kam ban tied nyngkong bad ka kamai 155 ron duh noh 6 wicket ha ki 20 over. U Md. Muksodul Choudhury marwei u kamai 41 ron na ki 20 bol bad u Skhembor Khongbtep u ïoh 2 wicket ai kamai 18 ron ha ki 4 over.
Haba beh ïa katei ka thong ba la buh da ka Cricket Lovers CC ka la kamai 11 ron duh noh 4 wicket ha ki 20 over bad dei u Shembhalang Pyngrope u kamai 67 ron na ki 54 bol bad u Md. Muksodul Choudhury u khur 2 wicket ai kamai 13 ron ha ki 4 over. Ïa ka nam Player Of the Match la ïoh da u Md. Muksodul Choudhury jong ka Cricket Lovers CC.