La pyntreikam ïa ka Model Code of Conduct ha baroh kawei ka South West Khasi Hills
Mawkyrwat, Rymphang, 17: U Deputy Commissioner (Election) jong ka South West Khasi Hills District u la ai ïa kane ka jingpynsngewthuh paidbah ba ha kaba ïa dei bad ka jingjied ïa ki nongmihkhmat sha ka Ïing Dorbar Thaw-aiñ jong ka Meghalaya ka ban sa long ha ka 27 tarik u Rymphang, 2023 bad khnang ba kan don ka jing-ïa-jied kan long ha ka rukom kaba khuid bad ba suba bad ïaid beit ryntih khlem kano nano ka jingbakla ne kaba be-aiñ ka Election Commission ka la pyntreikam ïa ka Model Code of Conduct (MCC) ha baroh kawei ka distrik.
Kane ka Model Code of Conduct (MCC) ka khang pyrshah ïa ki Political Party bapher bapher ban pyni paidbah Model Code of Conduct (MCC) ïa ki poster/lama/placard ha ki jaka sorkar bad ym shah ban thoh ki jingthoh ha ki kynroh, ban tah lane wah ïa ki poster, ki kot lane kino kino ki jingthoh ki ban pynsniewdur lane ban pyni ne pynïeng ïa ki dur ne lama bad kumta ter ter. Kino kino ki poster, lama, placard jong kino kino ki Political Party ki lah ban pyni paidbah tang ha ki jaka jong ki riew shimet ryngkat lem bad ka jingïamynjur lang (NOC) jong ki trai jaka ne ‘riew shimet bad ym shah ïa kino kino ki Political Party/Candidate lane ki nongbud ban pyndonkam ïa ki jaka, ïing, kynroh ne phyllaw bad kiwei kiwei khlem da ïoh jingbit na ki trai jaka, ki ‘riew shimet ha ka ban pynïeng ïa ki lama, poster, ban tah kot lane thoh kino kino ki jingthoh ne jingkynthoh pyrshah ïa kiwei pat ki Party.
Baroh ki party lane ki kyrtong ki dei ban burom ïa kiwei pat ki kyrtong lane ki party bad ym bit ban pynthut lane thaw kulmar ne ban pynwit ha ki jingïalang paidbah jong kiwei pat ki political party lane ban sam ïa ki kot lyngkdop jong ki party lane ban pynlong ki jingïalang paidbah ha ki jaka ba don ki jingïalang jong kiwei pat ki political party lane ban weng ïa ki poster jong kiwei ki party da ki nongbud jong kiwei pat ki party kaba dei ka jingpynkheiñ ïa ka aiñ jong ka elekshon kaba hap ha ka Kyndon 127 jong ka Representation of People’s Act 1951.
Ha kajuh ka por la khang ïa kino kino ki party/candidate ban canvas hapoh 100 meter jong ka polling station bad kiba pynkheiñ ïa kane ka aiñ kin hap hapoh ka kyndon 130 jong ka Representation of the People Act,1951. Ki political party kiba mut ban pynlong jingïalang paidbah kin hap ban pan jingbit halor ki jingïalang bad ban pyntip ïa ka por, ka jaka bad ban pyntip ruh sha ki bor pulit pahara halor kane ha ka por kaba biang.
Na ka bynta ban pyndonkam ïa ki kor pynsawa lane kino kino ki tiar pynsawa ha kino kino ki jingïalang paidbah kin hap ban pan jingbit shwa na ki bor ba dei peit bad ka dei ka hok jong u ne ka briew na ka bynta ka jingshongsuk shongsaiñ ha ka imlang sahlang.