Jur ka jingshah prong ki dukan ha Nongstoiñ

0

Nongstoiñ, Rymphang, 16: Ka sor Nongstoiñ katba nang mih ki sngi ki por, ka la sdang ban kham sor shuh shuh ha ki bynta bapher bapher naduh ki jingpynroi bad kiwei kiwei. Hynrei ryngkat kita ki kiei kiei, ka jingsniew ruh ka la nang roi ha kaba ki nongtuh ki la nang jyllei na kawei ka sngi sha kawei pat.
Halor kane ka bynta, na ka liang u nongthoh khubor ha ka jingïakren bad ki katto katne ngut ki longkmie kiba shong dukan ha sor Nongstoiñ, ki la pynpaw ba ha kine ki sngi ka jingshah prong ki dukan ha ki nongtuh nongthiem ka jur bha khamtam ha ka por mynmiet myniong.
Dang shen kawei ka longkmie, kata ka kong M.K Jahrin, kaba ju die kwai ha surok bah kaba don marjan bad ka skul Ri Lyngngam Nongstoiñ, ka la ïathuh ba ka la don kawei ka miet ba hadien ba lah miet, ka la khang ïa la ka dukan bad rung hapoh dukan ban ap ïa la u kurim ba un wan shaw. Hynrei, la ong ba namar ka jingslem than u kurim kam banse ban ap.
Pynban dei ha ka por 12 baje shiteng synñia mynmiet, ba ka la ïohi ïa uwei u briew u ba la sop spaiñ bha ïalade, u la leit ban law ïa u bol light bad pyrshang ban prong ïa ka dukan. Hynrei kane ka longkmie ka la pynthaba da ka mobile, kumta u la phet noh haba ïohi ïa ka jingshai hapoh kamra.
Kiba kum kine ki jingprong da ki nongtuh ha sor Nongstoiñ, kam dei shuh kaba dang thymmai hynrei kaba la ju jia na ka por sha ka por, kat haduh ba teng teng ka la don ka jingmynsaw ruh na ka liang ki nongshong dukan.
Kumta kaei kaba kongsan ka long ba ki paidbah hi khamtam ki nongshong dukan, ki dei ban husiar bha ïalade bad khamtam eh ban ïatreilang bad ki bor pynïaid shnong kum ki VDP bad ki bor pulit, khnang ban lah ban teh lakam bad ïoh kem ruh ïa ki nongleh kam sniew.

Leave A Reply

Your email address will not be published.