Nongstoiñ, Rymphang, 16: Sa kumba phra sngi shuwa ban poi ka sngi thep vote, san ngut ki kyrtong jong ka 33 Rambrai Jyrngam Assembly constituency, ha ka sngi palei ki la hiar sha ka shnong Mawlangsu ban pan jingkyrshan na ki paitbah na ka bynta jong ki ha kane ka election ban wan.
Ha ka jingïalang ba la long shongknor da u bah Sromwell Mawdoh sordar jong ka shnong New Mawlangsu, ki kyrtong kiba la poi ki long u bah Fernandes Dkhar na ka AITC, u bah Goldenstar Nonglong na ka Congress, u bah Kimfa S. Marbaniang na ka NPP, u bah K.P.Pangniang na ka HSPDP bad u bah R.G.Momin kyrtong shimet.
Baroh san ngut ki kyrtong ki la ïa pynksan ïa la ki jong ki nia ki jutang jong ki. U bah Fernandes Dkhar kyrtong ka TMC haba ai jingkren, u la ther tyngeh ïa ka sorkar MDA kaba la wanrah ïa ka mat ha Ïingdorbar ban pynlong aiñ ïa ka kam khalai. U la ong ruh ba hadien ba ka sorkar ka la pynbna ban pynlong aiñ ïa ka kam khalai, ki nongïalam jong baroh ki kynhun balang Khristan, ki la leit ban ïakynduh ïa u Myntri Ranbah ka jylla ban pyrshah ha kaba u la kular ban pyndam noh. Phewse katei ka jingkular ka long tang ka jingpynbiej.
U bah Goldenstar Nonglong kyrtong jong ka Congress, u la ong ba ha kine ki sngi ba la dep ki nongmihkhmat jong ka NPP bad kiwei kiwei ki la kren beiñ ïa ka Congress, khamtam eh u Conrad Sangma Myntri Rangbah ka jylla bad u bah Prestone Tynsong, kat haduh ba ki la ong ba ka lieng jong ka Congress ka la jan ngam. Hynrei, ka jingbeiñ jong ki ka long kumba ki beiñ ïalade, khamtam u Conrad Sangma haba u kren beiñ ïa ka Congress ka long thik kumba u kren beiñ ïa u kpa la jong u (L) Purno A.Sangma, namar ha ka por ba u long Cabinet Minister ha ka sorkar pdeng u don ha ka party Congress.
Nalor kata u la ong ba ka jingkren jong u bah Prestone ruh ka long thik kumba u kren beiñ ïalade, namar shuwa ba un rung ha ka NPP u dei u Minister jong ka Congress. U la ong ba lada ki kwah ban ïatai nia, u bah Nonglong u long u ba la kloi, namar kitei kiba u la kdew ki dei ki jingshisha ba wat ki paitbah ruh haduh mynta ki dang kynmaw bad ki tip shai ïa kata.
U bah Kimfa S.Marbaniang u la ong ba ka jingshah kynthoh ïa u hadien ba u la rung sha ka NPP ka jur bha. Hynrei kitei ki jingkynthoh ki long pynban ki jingkyrkhu ïa ka party, namar ka jingleit pynïasoh jong u sha ka NPP kam dei kaba u leh marwei. Hynrei hadien ba u la shah suspend ha ka Congress, u la ju tyrwa bunsien ba kin wan ban ïasngewthuh jingmut lada ki kwah ba un ïaiñeh ha ka party. Pynban kim sngap bad ki patiaw, kumta ki nongkyrshan jong u na baroh ka constituency ki la ai jingmut ïa u ba un rung noh sha ka NPP. Dei halor ka jingai jngmut jong ki paitbah ba u la rung noh sha ka NPP.
U bah K.P.Pangniang u la ong ba ka ha ki snem ba um pat shah jied kum u MLA, ka constituency jong u ka dei kaba sahdien tam na ki constituency baroh. Ha ka por ba u long kum u MLA, u la pyrshang katba lah ban pynpoi ïa ki jingïarap sha baroh ki shnong. Hynrei namar ba ka MLA skhim ka dang long tang shi klur tam, kumta kam lah satïa ban pynbiang lut ïa ki paitbah ka Constituency.
U la ong ba ha ka jingïalang ba la khot da u Myntri Rangbah shuwa ban ïatai ha Assembly, marwei u la ïeng ban pyrshah triang. Hynrei u bah Prestone Tynsong Symbud Myntri Rangbah u la kdew kti pynban da kaba ong ba ka HSPDP ka dei ka party kaba shu pyrshah beit ïa ki jingthmu jong ka sorkar, naduh ba ka thmu ban phah khlong ïa u Uranium na Domïasiat, ka jingthmu ban wanrah ïa ka lynti rel, ka jingthum ban wanrah ïa ka aiñ khalai bad kiwei kiwei. U la kynnoh ruh ba kumno ka sorkar kan shu sngap ïa une u nongïalam jong ka party kaba shu pyrshah beit katba ka sorkar ka thmu ban wan rah ïa ki kam pynroi.
U kyrtong ba khatduh u ba ai jingkren dei u bah R.G.Momin kyrtong shimet. Hynrei na ka daw ba um da nang bha ban kren khasi, la ïarap ban kren paitbah da ki nongbud jong u ba kynthup ïa u bah S.Mawtyllup, u bah Hander John Kharbani bad kiwei kiwei.
Wat la katta ruh kum u kyrtong u la ai jingkren bad ha ka jingkren jong u, u la ong ba baroh ki nongthep vote ki dei ki Khristan kumta ki dei ban duwai jur shuwa ba kin leit thep vote. U la ong ruh ba kum u nongtrei sorkar u hap ban shongthait noh na ka kam, namar ba u ïohi ïa ka jingeh jong ki paitbah ka Constituency. Kumta lada ki paitbah ki kwah ïa ka jingkylla kin sngewbha ban thep ïa ka vote jong ki ha ka shap jong ka torch light.
