Jowai, Nailar 03: Ïa ka ‘Intergrated Health Camp’ hapoh ka West Jaiñtia Hills District la plie paidbah mynta ka sngi Thohdieng haka jingïalang ba la pynlong ha Ladthadlaboh Community Dorbar Hall, Jowai.
Kane ka Campaign ka long shi bynta ban ai ka jingsumar ïaki paidbah nongshong shnong ka District haka liang ka koit ka khiah. Da kaba buh thong haduh 17 tylli ki static camps ha ryngkat ki outreach services kiba peit ïa ki 150 haduh 200 tylli ki shnong kiba hap hapoh ka District.
Ïa kane ka prokram la pynlong ha ryngkat ka jingïatreilang bad ka District Medical & Health Officer, Jowai, ka ophis jong u Deputy Commissioner ka West Jaiñtia Hills, Meghalaya AIDS Control Society, Shillong bad kiwei de ki tnad sorkar.
Hapoh kine ki ar bnai jong ka campaign ki paidbah kin ïoh shibun ki jingmyntoi ha ka liang ka koit ka khiah naduh ka jingleh checkup, testing ka jingsumar ïa ka jingpang tuberculosis (TB), HIV, ka jingtes ïa ka Hepatitis B bad C, ban pynrung kyrteng hapoh ka MHIS bad yn don ruh ka jingleit leit rung sha manla ki thliew ïing da ki briew jong ka tnad ka khoit ka khiah.
Ha kane ka sngi plie u ma A. Lipon, uba dei u President of Synjuk Ki Waheh Shnong Ri Jaintia ula long kum u kongsan, ha ryngkat ka jingdon lang u Waheh Chnong Ladthadlaboh, ma A. Shullai, nalor kiwei de nongtrei jong ka koit ka khiah.
U ma A. Lipon, haka jingkren ula ai ka jingïaroh halor ka jingpynlong ïa kane ka campaign na ka bynta ka jingmyntoi ki paidbah ka District, ula ong ba ka jingkoit jingkhiah ka long kaba donkam eh ha uwei pa uwei u briew bad lyngba kane ka Campaign kan long ka jingkyrkhu ïa kiba buh ba lang.
U la ai mynsiem ruh ïa ki nongtrei jong ka koit ka khiah bad ki Volunteers ba kin ïaid shakhmat ban ai ka jingtip ba khambniah ïa ki nongshong shnong ba kin shim ïa kane ka kabu na ka bynta ka jingkoit jingkhiah.
Ka Dr (Mrs) B. Decruse, Project Director, MACS haka jingkren pdiang sngewbha kala pynsngew halor ka jingdonkam jong kane ka campaign kaba phai khmat bha sha ki thaiñ nongkyndong, kala ong ruh yn ai jinghikai ei ïa ki paidbha lyngba kane ka Campaign. Kala kdew ruh ba ka jingpang HIV ka dei ka bynta ba kongsan ha kane ka Campaign bad ban ai jingtip halor ki lad jingïada sha ki paidbah.
Na ka liang ka kong R. Passah, District Social Welfare Officer kala kren kumjuh ha kane ka sngi, katba ïa ka jingïalang la pynïaid da Dr. M. Syngkon, District Surveillance Officer, Jowai bad Dr. S. Suja, DNi, NVHCP ila ai ka jingkren ai khublei.
