Nongpoh, Nailar 03: Kumba la don ka jingud jingnam na kiba bun ki paidbah ka Ri Bhoi District, ba ki la shah ktah jur shisha na ka jingthud palat ka bording ilektrik, u MLA ka Nongpoh Constituency bad kum u Nongmihkhmat na Ri Bhoi District, u Bah Mayral Born Syiem, u la kyntu jur ïa ka tnad MeECL ba ka dei ban shim khia na ka bynta ban weng ïa kane ka jingeh ki paidabh kaba ki shah ktah na ka jingthud palat ka bording ilektrik.
Haba ïa kren mynta ka sngi bad ki Nongthoh Khubor, u MLA ka Nongpoh, u Bah Mayral Born Syiem, u la ong ba kum u nongmihkhmat paidbah u dap shisha da ka mynsiem jong ka jingsngewkhia bad ka daw ka long ba ka jingthud bording ilektrik ha Ri Bhoi District ka la ktah shisha ïa u paidbah babun balang.
U la ong ha ka jingshisha khamtam ha Nongpoh kaba dei ka Headquarter ka District, ka dang shah ktah ha ïane ka jingthud ka bording ilektrik bad ïa kane u la ioh pdiang ruh shibun ki jingujor naduh ki riew rangbah, ki longkmie ki longkpa, ki samla bad khamtam ki khynnah skul, ba kane ka jinglip bording ka la ktah shi katdei ïa ki kam ki jam jong ki paidbah ba ha kane ka juk stad ba mynta la hap ban pyndonkam lyngba ki bording ilektrik ha baroh ki jaid kam.
Namarkata, la kyntu ruh ïa ka tnad MeECL ba ka dei ban shim khia halor kane ka jingeh ki paidbah, katba ka sorkar kam pat lah ban pyntreikam ïa ka 132 KV Power station khnang ba kum ki paidbah kin nym mad jingeh lyngba kane ka jinglip bordin ba khah khah ha baroh ki bynta jong ka Ri Bhoi District.
Shuh shuh, ha kawei ka bynta, u ai khublei kyrpang ïa ka sorkar jylla kaba la mang tyngka haduh T. 78 klur na ka bynta ban wan rah noh ïa ka 132 KV Power station ha Nongpoh bad u khmih lynti ruh tang shu dep ban shna ïa kane ka Power station ba thymmai kan weng noh ïa kane ka jingeh ba ki paidbah ki mad na ka jinglip bording ba khah khah, u la bynrap.
