Shillong, Nailar 03: Ka jingïalang kaba kyrkieh jong ki dkhot ka Bench bad Bar ha Shillong kaba la long ha ka sngi Saitjaiñ ha Shillong Bar Association ka la pynpaw ïa ka jingsngewlem halor ka jingkhlad noh (L) M. G. Lyngdoh, Advocate ha ka 01.08.24. ïa ka jingïalang la pynïaid da ka Hon’ble District and Sessions Judge, Shillong ka Kong D.R Kharbteng bad ki dkhot jong ka Subordinate Judiciary ha ryngkat bad ki dkhot jong ka Bar kiba la donlang.
Ha ka jingïalang la kynmaw burom ïa (L) M.G Lyngdoh Advocate ba la long dkhot ba la rim bha jong ka Shillong Bar Association naduh u snem 1989. Na ka liang District and Sessions Judge Shillong ka Kong D R Kharbteng, nangta u Additional District and Sessions Judge Shillong u Subir Sen, Advocate u H R Nath President ka Shillong Bar Association, Advocate bad u Ranabir Choudhury Advocate ki la ai jingkren ha kane ka jingïalang ha kaba ki la pynpaw ba ka long ka jingduh kaba khraw ïa ka Bar bad ka Bench.
Ka jingïalang ka la pynpaw ruh ka jingsngewlem bad pynpaw ruh ba ka mynsiem jong (L) M G Lyngdoh, Advocate ban ïoh ka jingjah thait bymjukut bad ba u Blei Trai Kynrad un ai ka bor bad ka jingpyntngen ïa ka ïing ka sem.
