Kynduh mawsiang ki ophisar Sorkar ban pynbha bym ailad ki trai khyndew

Nongstoiñ, Nailar, 03: Ki lum ba itynnad ka Mawlangkhar ba la ju khot ruh da ki katto katne kum kata ka ‘Green Desert’, kaba don ha ka shnong Ksehkohlong West Khasi Hills, ki dei ki jaka kiba la khring bha ïa ki paidbah nongleit nongwan naduh ki snem kiba kham mynshuwa eh. Bun ki nongwei nongar haba ki leit jingleit lyngba kine ki jaka kiba don harud jong ka surok bah National Highway, ki ju hiar na ki kali ban peit kai bad shon dur ïa ka jingitynnad ka jaka.
Nalor ki lum ba itynnad jong ka Mawlangkhar kiba la pynlong lypa da ka mei mariang. Hynrei ha ka por jong u Deputy Commissioner barim jong ka West Khasi Hills District u Bah K.L Tariang, lyngba ka jingïakren sngewthuh bad ka shnong Ksehkohlong bad ki trai khyndew, ha u snem 2008 u la pynlut haduh kumba 8 lak tam na ka tnad DRDA bad na ka Soil Department ban den pat sa ïa ka pung Pamphyrnai. Kane ka pung ruh ka don ha surok bah National Highway, ha kjat jong kitei ki lum bad ka dang ïaineh sah haduh mynta bad kane ruh ka la khring bha ïa ki paidbah.
Hynrei ha kiba bun hi ki sah ha ka lyngngoh ba balei kat kine ki jaka kiba itynnad, pynban na ka liang ki bor shnong bad ki bor sorkar, kim phai khmat ne shimkhia na ka bynta ban pynbha pynitynnad shuh shuh ïa ki, lyngba ki lad ki lynti kiba bun jait jong ka sorkar.
U Nongthoh khubor haba wad jingtip ïa kane ka bynta, u la ïoh ban ïakren markhmat bad u Sordar jong ka shnong Ksehkohlong u Bah Ioanis Lyngdoh Lyngkhoi. Na ka liang jong u Sordar u la pynpaw ba ka jingeh hi ka dei namar ka jingbym long la kloi jong ki trai khyndew ban ai ka kti kadiang ka kti ka mon.
U la ong ba ka jingïohi ki paidbah bad ki tnad sorkar ka dei ka jingthmu kaba bha eh bad ka ban ai jingmyntoi nyngkong eh ïa ki trai jaka trai khyndew hi. Hynrei u ong ba ka jingeh ka dei namar ka dei ka khyndew khurit bad kam dei ka khyndew raid ba lah ban tuklar da u Syiem ne ka Shnong.
“Bunsien bun wat, ki Ophisar na ki tnad bapher bapher kum u BDO, na ka tnad Soil Department bad kiwei kiwei, ki la wan wad ïa nga bad kyntur ïa nga, halor kumno ban pynbha bad pynitynnad shuh shuh ïa kane ka jaka, namar ka la khring palat ïa ki paidbah. Hynrei kum u nongïalam shnong ngam lah leh ei ei namar ba ki trai khyndew kim shym la mon ban kyrshan lang”, ong u Bah Ioanis.
“Ngi la shong jingialang ruh da ki phew sien halor kane ka kam bad ki trai khyndew. Ngi la pyrshang ban pynsngewthuh katba lah ïa ki halor ki jingmyntoi bad ka jingroi jong ka shnong ka thaw halor ki prokram bad jingbei tyngka na ki tnad sorkar. Nga lyngngoh ruh namar ha ka por ba long jingialang ki la kohnguh. Hynrei haba la poi ha ka kam ban sdang pyntreikam ïa kita ki jingthmu, ka la shu sahkut noh, namar ki kyrngah khlieh bad don kiba ong ruh ba lada shu ieh kumne kumba ka long ruh kan leh aiu”,
U la ong ruh, “Hooid, kum ka shnong ngi angnud eh ban pynbha ïa kine ki jaka bad ban wanrah ïa kata ka Mini Park kumba la ïakren bad ki heh sorkar kham mynshwa. Hynrei ban pynbor ïa ki pat ngim lah”, ong u Sordar bad bynrap, “Kum u nongïalam shnong bad kiwei ki para shnong, ngi sngewthuh bad ïohi ïa ka dur kaba itynnad jong ka shnong jong ngi ba la pynlong lypa hi da ka mei mariang. Lada treilang sa bad ki bor sorkar lei lei, ka shnong jong ngi naduh mynno ka la kup da kawei pat ka dur”.
“Ngan shu ong shikyntien ba lehse kata ka jingangnud jong ngi kan sa lah ban urlong sa ha ki pateng ban wan. Kumba long ïa mynta te ngim don lad don lynti bad wat na ka liang ki Ophisar sorkar ruh ki la ngiah, namar la lai snem mynta ym don shuh mano mano kiba wan wad wan kylli ïa nga halor kane ka phang”, u la ong.
U Bah Ioanis u la ïathuh ruh ba ha katei ka Pung Pamphyrnai ki don haduh 12 ngut ki trai jaka, kiba kam jaka ha la ki bynta jong ki. Napdeng kine don kiba mynjur, hynrei khambun hi ki pynpaw ba lada ym don kita ki jingroi ruh ym lei lei bad bun ruh kiba don jingsngew tieng sngew artatien lada wanrah ïa kita kiei kiei.
Kumba ka long mynta, ki lieng kynda kiba ju don ha katei ka pung ki la jah lut bad u trai jaka jong ka jaka pdeng jong katei pung Pamphyrnai, u ju pynïaid ïa ka pung kum ha ka kam ïakop khwai dohkha man ka por.