Khliehriat Risaw 6: Ha kaba ïadei bad ka jingmaramot ïa ka surok national highway 6, ka National Highways Authority of India (NHAI) ka ong ba mynta ka la buh da uwei u contactor ba thymmai u ban pyntrei ïa ka jingmaramot ïa ka surok ha East Jaiñtia Hills District kaba naduh Sonapyrdi ( (km 141+500) haduh Ratacherra (km 171.455).
Ka NHAI ka la aiti ruh ïa ki kaiphot sha ka iïngbishar jong ka Meghalaya High Court ha u bnai risaw ha ka por ba pynlong ïa ka Hearing halor ka PIL ba la buh da u samla Kynjaimon Amse.
Ka kaiphot ka paw ruh ba u contractor uba dang don ruh u dang kwah ban shim ïa kane ka kam ban maramot ïa ka surok kaba naduh Jowai (km 69.20) haduh Sonapur (km 141.50), la ong ruh ka jingmaramot ban pyndap ïa ki thliew hapdeng surok, ban pynkhuid ïa ki nala tuid um ha Khliehriat, ban maramot ïa kiba la jot la pra bad ha ka kaiphot la bsuh lang ruh lem bad ki dur ba pyni ba ka jingmaramot ka dang iaid shakhmat.
Na ka liang ka iïngbishar ka don ka jingkyrmen ba ka kam kan long kaba bha bad kaba iaid beit kumba la pynpaw da ka NHAI khnang ba ki paidbah ka thaiñ bad ki nongleit nongwan kiba ïakynduh jingeh kin kham suk..
U samla Kynjaimon Amse uba la ujor ïa ka PIL u la pyni ruh ïa ki dur jong ka surok national highway kaba ha Mynkre, ha Tongseng, ha Lumshnong, ha Sonapyrdi, kaba pyni ïa ka jinglong jingman ka surok kaba la jot rathai kaba la dap sa tang ki thliew hapdeng surok ka bym don dien rong shuh kum ka surok.
Ka iïngbishar High Court said, ka la sngew kyndit eh haba iohi ïa ki dur jong ka surok bad ong “Kane te ka dei ka ba ym lah satia ban pdiang ha kaba kum kane ka ri ba la shai bad ka long kaba sngew lehraiñ ban ka iïngbishar ka hap ban pynkynmaw ïa ka Central body jong ka NHAI, nalor ba kane ka dei ka surok kaba ki kali kiba kit ïa ki mar kiba donkam ki iaid lyngba na kane ka surok bad kaba kum kane ka jinglong ka surok ka wanrah ïa ka jingthut ha ka leit ka wan.
Ka iïngbishar ka khmih lynti ba ka surok national highway kaba naduh Jowai shaduh Ratacherra ruh kan bit kan biang noh ha une u bnai u ban wan bad la ong ruh ba ki nongtrei jong ka thaiñ ki la pyntip sha ki bor kiba halor jong ka NHAI ba ki nongtrei jong ka NHAI kin shim khia ba ka surok ka dei ban long kaba bha bad ruh na ka liang u Deputy Commissioner ka East Jaiñtia Hills District ruh u hap ban phah ïa ki kaiphot halor ka jinglong jingman ka surok NH-6.
Ha kajuh ka por, ka iïngbishar ka la bthah ruh ïa ka sorkar jylla ba ka dei ban pyndep ruh ïa ka jingmaramor ïa ka surok Jowai Bypass hapoh ka saw taïew bad ka pynbna ruh ba ïa ka hearing yn pynlong biang ha ka 6 tarik u naiwieng.
