Shillong, Risaw 06 (PIB): U Myntri Rangbah jong ka jylla Meghalaya mynta ka sngi u la pyllait ia ka jingniah thuk thuk sha kylleng ka ri da ka
, ka kynhun jong ki nongniah thuk thuk kiba dei ki dkhot ka CRPF Shillong. Ka CRPF ha ka jingiatreilang bad ka Tnat Women and Child Development ka la pynlong ia kane ka jingniah thuk thuk ban rakhe ia ka Nari Shakti (ka jingpynkup bor ia ki longkmie) ha ka ri.
Haba ai jingiaroh ia ka jingshlur kaba khraw, ka jingkut jingmut bad ka jingshlur ba la pyni da ki longkmie jong ki kynhun shipai bapher bapher, u Conrad Sangma u la ong ba ki longkmie kim duna iano iano bad ba kane ka prokram bad ka jingniah thuk thuk kadei kawei ka nuksa jong ka Nari Shakti. Haba pynpaw ka jingkmen jong u ban iadon bynta ha kane ka prokram kaba kongsan, u Myntri Rangbah u la ong, “Na ki bynta bapher bapher jong ka ri, ki longkmie nongniah thuk thuk jong ka CRPF kin sdang ia ka jingiaid lynti jong ki bad kin iakynduh lang ha u statue of unity bad kumta kalong ka burom kaba khraw ia nga bad ka jingsngew sarong ban iadon bynta bad kane ka prokram kaba kyrpang bad sa shisien nga ai khublei ia ka CRPF na ka bynta kane ka prokram kaba ki la pynlong.”
U Myntri Rangbah u la ong ba u ju ngeit ba ka roi ka par ba shisha ka lah ban wan haba “ngi lah ban ktah ia man ka jingim, haba ngi lah ban kyntiew bad rah shakhmat ia man u briew, haba ngi lah ban wanrah ka jingryntih hapdeng ki kynthei bad shynrang bad hapdeng ki jaitbynriew.”
Haba kren shaphang ka thong jong u Myntri Rangbah duh ka ri ban pynlong ia ka ri kaba la kiew bad kumno kum kine ki sienjam ki wanrah ka jingplie lad ban wanrah ia ka jingiaryngkat kyrdan hapdeng ki nongshong shnong, u Sangma u la ong, “Ka ri kaba la kiew shisha, kaba u Myntri Rangbah duh jong ngi u la kren shaphang bad ba la buh thong ba hashuwa u 2047 ka India kadei ban long ka ri kaba la kiew kane ka lah ban jia tang haba man ka jaitbynriew bad man u nongshong shnong bad man ka bynta bad u briew jong ka ri ba khraw jong ngi ki iaid shaphrang. Bad kumta kaei kaba ngi iohi mynta kadei kawei ka nuksa jong kata ka sienjam ban pynthikna ba ka don ka jingryntih ha ka rukom treikam jong ngi.”
U Sangma u la ong ba ka jingniah thuk thuk kadei ka jingpyndon burom ia ka Nari Shakti jong ngi, kaba long ka dustur kaba la rim bha jong ka deiriti jong ngi bad ka jingpyni ia ka bor jong ki longkmie. “Ka Meghalaya bad ka deiriti jong ngi, ki briew bad ki jait bynriew hangne ki la bat ia kane da ki spah snem. Ka Meghalaya kadei ka imlang sahlang kaba ai jait sha ka kynthei bad na ka bynta ka jingtip jong ki nongniah thuk thuk bad ki ophisar kiba wan na ki bynta bapher bapher jong ka ri kin dap da ka jingkmen ban tip ba ki jaitbynriew jong ka Meghalaya bad ki briew ki la trei na ka bynta ka Nari Shakri bad ka jingiaryngkat kyrdan da ki spah snem.”
U Sangma u la ong ba ki la don ki sienjam ban pynthikna ba ki longkmie ruh ki iashim bynta ha ki kam ka ioh ka kot ha ka jylla. U la ong ba ka Meghalaya ka long kawei na tang katto katne ki Jylla kiba la pyllait ia ka resolution ban buh kyrpang 50% ki post Secretary bad President jong ki Village Employment Council na ka bynta ki longkmie. U Myntri Rangbah u la ong ruh ba ha kine ki san snem ba la dep, ka jingiashim bynta ki longkmie ha ki Self Help Group ka la kiew na ka 30,000 sha ka 4.5 lak. Kane ka pyni ia ka jingkut jingmut ka Sorkar ban pynkupbor ia ki longkmie ha ka jylla bad kane ka kyntiew ia ka bynta jong ki ha ka ioh ka kot.
U Myntri Rangbah u la pynpaw ka jingsngewnguh ruh ia u Myntri Rangbah Duh halor ka jingmynjur ia ka Women Reservation Bill bad u la ong ba ka jingiashim bynta jong ki longkmie ha baroh ki bynta jong ka jingim ka long kaba donkam bha na ka bynta ka jingpynkupbor ia ki. Kum shi bynta jong kane ka sienjam, lai kynhun jong ka Jingniah Thuk Thuk da ki longkmie ka CRPF ki dei kiba la pyllait paidbah na Shillong, Srinagar bad Kanniyakumari bad kin ia kynduh lang ha Ekta Nagar, Gujarat ha ka 31 tarik u Risaw, ha ka lyngkhuh sngi kha jong u Sardar Vallabhbhai Patel. Kane ka jingniah thuk thuk kan iaid lyngba 3291 km bad ha kane, kine ki nongniah thuk thuk kin iaid lyngba hynniew tylli ki jylla shuwa ba kin iakynduh lang ha Ekta Nagar.
Ha kane ka jingiaid lynti jong kane ka jingiatreilang hapdeng ka CRPF bad ka tnat Women and Child Development, kine ki lai tylli ki kynhun na Srinagar, Shillong bad Kanyakumari kin iakren bad ki briew kiba iadei bad ka kam “Beti Bachao Beti Padhao” (BBBP) kum ki khynnah skul bad ki samla kynthei kiba leit kolej, ki SHG jong ki longkmie, ki cadet jong ka NCC, ki khyn jong ki CCI, ki dkhot NYKS, ki samla shynrang bad kynthei, ki nongtrei anganwadi ha ki distrik bapher bapher. Ka jingthmu ka dei ban pynkhlain shuh shuh ia ka prokram “Beti Bachao Beti Padhao” jong ka tnat Women and Child Development.
Ha ryngkat ka jingkyntiew ia ka khubor “Desh Ke Hum Hain Rakshak” jong kane ka kynhun, kine ki longkmie ba niah thuk thuk ki wanrah ruh ia ka khubor jong ka “Beti Bachao Beti Padhao” ha kane ka jingiaid lynti jong ki. Kin pyni ia ka logo BBBP ha ki jain bad ki banner jong ki kum ka dak jong ka jingkyrshan jong ki ia kane.
U Bah Paul Lyngdoh, Myntri ka tnat Social Welfare, Sorkar Meghalaya, u Anurag Agrawal, IG, NE Sector, CRPF, ki heh pulit, Defence bad ki bor pyniaid ia ka jylla ki la iashim bynta lang ha kane ka prokram.
