Jowai, Risaw 20 : ïa ka taïew leh burom ïa ka ‘wildlife Week’ halor ka phang “Partnership for Wildlife Conservation” la pynkut hynnin ka sngi 20 tarik haka prokram bala pynlong da ka ophis Divisional Forest Officer, Jaiñtia Hills Wildlife Division, Jowai ha shnong Demthring Community Hall. Ha kane ka sngi na ka liang u Principal Chief Conservator of Forest (Biodiversity & Wildlife) and Chief Wildlife Warden u S. M. Sahai, IFS ula wan ban ïadonlang kum u kongsan ha ryngkat u Chief Conservator of Forest (Wildlife) u P. K. Agrahari, IFS kum u symbud kongsan.
U S.M Sahai haka jingkren ula batai shaphang ka jingrakhe ïa kane ka taïew ban pynneh pynsah ïa ki khlaw ki btab da ki shnong (Community) kiba la leh naduh ki longshwa manshwa. Haka juh ka por u ai khublei ïa ki trai shnong kiba ai jingkyrshan manka por da ka jingïatreilang bad ka tnad khlaw na ka bynta ban ïada ïa ki khlaw ki btab bad ki mrad ki mreng.
Shi bynta na kane ka jingrakhe ïa ka taïew kila pynlong ruh ïa ka jingïakop dro dur bad ka Extempore competitions na ka bynta ki khynnah skul ha kaba la sam ruh ïa ki khusnam sha ki nongjop.
Ha ka juh ka sngi ka tnad khlaw jong ka District kala sam ruh ïa ki khusnam sha kito kiba pynlait im ïa ki mraw khlaw kaba la ai kyrteng ka ‘Wildlife Samarita Award 2022-2023’ kata sha u Daioo Wan na Moodymmai Wah bad ka Kelsi Lapasam na Chutwakhu, Jowai kiba la pynlait im ïa u Barn-Owls.
Na ka bynta ka khusnam ‘Samarita Award 2023-2024’ la sam sha u Monlang Talang na Nongbareh Rim Village ba pyllait im ïa u Leopard Cat, u Hynruki Dkhar na Barato bad u Sambha Dhar na Ladthadlaboh, Jowai ïa u Slow Loris, u Achuhmi Lamare na Mupliang Village ïa u Masked Palm Civet, u Marbanki Law na Moolibang Shangpung ïa u Asian Barred Owlets.
Ka Emmichirup Jones Pyrtuh na Sohmynting Village ïa u Keeled Box turtle, u Shanlangki Sungoh na Shagpung Khliehrangnah bad ka Fairy June Sungoh na Mootyrchiah ïa u Monitor Lizard, u T.Padit na Mynsngat ïa u Leopard cat, u Liiomio Laloo na Tpep Pale, Jowai ïa u Indian Giant Flying Squirrel, u Saphiius Suting na Salaroh, Jowai ïa u Tokay Gecko, u Kopsarlin Rymbai na Salaroh, Jowai ïa u White Breasted Kingfisher, u Arban Sungoh na Mooralong, Jowai ïa u Black Kite Indian bad u Damemaia Sakhiat Laloo na Khimmusniang, Jowai ïa u Ferret Badger.
Ha ka juh ka por katei ka tnad khlaw kala leh burom kumjuh ïa ki Rangbah Shnong jong ki 6 (hynriew) tylli ki shnong.
Kiwei de kiba ïadonlang ha kane ka ngi ki kynthup ïa ka Additional Deputy Commissioner H.M.L.Kynta, MCS, ka kong N. Laloo. MFS, Divisional Forest Officer, Jaiñtia Hills Wildlife Division, Jowai, ka kong M. Suchiang, Forest Pleader, u S. Law, Range Forest Officer/c Umkiang Wildlife Range, Khliehriat, u N. Medhi, Senior Biologist, Wildlife Wing, Meghalaya Shillong bad Dr. Aniket Pawar, Bombay Natural History Society (BNHS) kiba la ai ruh ka jingkren ha kane ka sngi.
Ïa ka jingïalang la pynïaid da u D.N War, MFS, Assistant Conservator of Forest, Jaiñtia Hills Territorial Division, Jowai, katba u S P R Shullai, Range Forest Officer, I/c Jowai Wildlife Range, Jowai ula ai ki kyntien ai khublei.
