Jowai: Ka West Jaiñtia Hills District ha ka jingïasnohkti lang ïa ka jingrakhe ïa ka lyngkhuh ïoh jylla ba pura ba 52 snem jong ka Meghalaya ne ka ‘52nd statehood day of Meghalaya’ la pynlong ïa ka jingïalang mynta ka sngi ha District Library Auditorium, Mynthong ïa kaba la pynlong da ka ophis jong u Deputy Commissioner, Jowai bad u ma Lahkmen Rymbui, MLA ka 7-Amlarem Constituency u la long u kongsan.
U bah F.B Basan, Additional Deputy Commissioner, ka kong B. Blah, Additional Deputy Commissioner, u ma C. Syrti Superintendent of Police, WJH, u Dr. H.H Mohrmen, nongshong shnong ka nongbah Jowai, ki khlieh jong ki Department bapher bapher kila wan ban ïashim bynta lang ha kane ka jingrakhe.
Ha ba ai jingkren u ma Lahkmen Rymbui ula ïaroh ïa ka jingnohsynniang jong kito ki nongïaleh ban pynïoh ïa la ka jong ka jylla. U kyntu ïa baroh ki nongshongshnong jong ka District ban long ki briew kiba don ka jingkitkhlieh bad ban don ka jingïatylli ban wan rah ïa ka roi ka par hapoh ka District.
Ula pynkynkynmaw sha ki paidbah halor ki kam pynroi kiba la lah ban leh da kane ka sorkar, kum ha ka pule puthi, ka koit ka khiah bad kiwei pat ki jingshna jingtei.
U la kyntu ïa ki samlal jong ka District ba kim dei ban ngop ha ki jingdih ïa u drok bad kino kino ki kam sniew lyngba ki social media, u kyntu ïa ki ban pyndonkam noh ïa ki skhim sorkar bapher bapher kiba la ai na ka bynta ka jingmyntoi jong ki.
U bah Basan ADC ula ïoh ban pyni lyngba ka Power Point presentation shaphang ki skhim pynroi kiba pher bapher ba la pyntrei da ki tnat sorkar bapher hapoh ka District.
Kiwei de kiba la ai jingkren ha kane ka jingïalang ki kynthup ïa ka kong B. Blah, ADC, u bah S. Phanbuh Assistant Commissioner, u Dr. HH Mohrmen bad I. Phawa, Assistant Research Officer Planning Branch, Jowai.
Ka la don ruh ka jingpynkup burom ïa ka Reesa EE Christine Suting jong ka North Liberty Higher Secondary School kaba la ïoh ïa ka position ba 11 ha ka SSLC Examination bad ïa ka Larisa Lamin jong ka Adventist Higher Secondary School, Thadlaskein, kala la ïoh 1st Position ha ka HSSLC (Arts). Ki don ruh ki jingpynbyrngiah kum ka jingshad bala shim bynta da ka Sein Raij Jowai bad ki dkhot jong ki Self Help Group.
