Khliehriat, K’Lyngkot 20: Ha ryngkat lang bad ka jylla hi barog kawei, ha Khliehriat East Jaiñtia Hills District ruh la rakhe ïa ka sngi ba kyrpang jong ka jylla kaba 52 ba la tip kum ka Meghalaya Day 2024, ïa ka prokram la pynlong ha conference hall ha ophis u Deputy Commissioner ha Khliehriat.
Haba kren kum u kongsan, u Deputy Commissioner East Jaiñtia Hills District, u Abhilash Baramwal,IAS u la ai ka jingiaroh ïa ka jingitynnad ka jylla Meghalaya kaba don ka mariang kaba itynnad bad kaba dap da ki jingkyrkhu bad u la ai khublei ruh ïa baroh ki heh sorkar bad ki riew paidbah kiba la wan sha kane ka prokram mynta ka sngi.
U Additional Deputy Commissioner, East Jaiñtia Hills District, ubah G. Warjri u la kren halor ka jingioh jylla ka Meghalaya bad ka jingiakhi ban ioh la ka jong ka jylla bad ong ba kane ka dei ka sngi ka ba ju pynsah jingkynmaw ïa ki paidbah jong ka jylla bad kyntu ïa ki nongshong shnong jong ka jylla ban ai ïa ka bah tam ban kyntiew ïa ka jylla.
La pynbyrngia ïa kane ka prokram da ki jingshad tynrai na ki khynnah pule jong ka Khliehriat Higher Secondary School bad ka Rymbai Government Secondary School.
La ong ruh ba man la u snem la ju rakhe ïa kane ka sngi jong ka Meghalaya ha ka 21 tarik u kyllalyngkot hynrei mynta u snem la rakhe ha ka 20 tarik namar ka 21 tarik ka hap ha ka sngi u Blei.
Kiba la ïa don ryngkat ha kane ka sngi ki kynthup ruh ka Assistant Commis-sioner, ka kong F.Wann, ki nonghikai bad ki khynnah suk bad kiwei kiwei.
