Shillong, Ïaïong 09: Ka Under-16 Football Tournament ba la pynlong da ka Mawpynthaw Sports Social and Cultural Organisation (MSSCO) ha ka sngi Saitjaiñ jong ka 8 tarik hapoh madan ïalehkai ka Mawpynthaw ka la poi noh sha kaba kut da ka jingïakhun final hapdeng ka Ïewpomtiah Sports Social and Cultural Club (ÏSSCO) pyrshah ïa ka Mawpynthaw Sports Social and Cultural Organisation ha kaba ka Ïewpomtiah Sports Social and Cultural Club ka la ïoh rah ïa ka nam lahduh da 3 la 0.
Ha kane ka sngi u MLA ka Nongkrem u Bah Ardent Miller Basaïawmoit u la wan sakhi lang kum u kongsan nalor kiwei pat ki riew rangbah kiba la shah khot sngewbha na kynthup naduh u Bah I. Warbah Rangbah Shnong, Bah F. Kharsahnoh President Club, Bah B. Lyngdoh Chairman Nongkrem Dorbar Pyllun, Bah K Bishar R Warkhyllew Secretary Club bad Member Shillong Sports Association bad kiwei kiwei.
Na ka liang ka MSSCO ka la ïoh ban aiti ïa ka dorkhas sha u Bah Ardent na bynta ba un wad lad ban pynbha ïa kane ka madan ïalehkai khnang ba kan long ka jingkyrkhu ïa ki samla lehkai bad ki ongshong shnong kane ka shnong.
“Baroh phi ïa tip ba ngam ju kular lupa ïa kano kano ka kam hynrei kumba nga la ju ong ha ki snem kiba la leit ba ngi ïatreilang ban pynoh ïa ka bhah ba dei hok jong kane ka shnongm” ong u Bah Ardent haba kren halor ka jingpan mang pisa na bynta ban pynbha ïa ka jingker ïa ka madan bad kumjuh ka jaka shong ki nongpeit kai.
Ha kane ka sngi la sakhi ba ka don ka jinglehkai kaba itynnad hapdeng kine ki ar tylli ki kynhun hynrwi ha ka kylla step la ïohi ba ka Ïewpomtiah ka la ïoh ban pynkhih jar bad kumjuh ha ka kylla miet da ka jingbakla u rang apkol ola ïoh ban pynkhih jar biang sa arwat.
Ïa ka nam kum u rang ap kol ba tbit tam la ïoh ban rah da u rangïalehkai jong ka Ïewpomtiah u Ïaïaidryngkat Mylliemngap katba ïa ka nam jong u nonglehkai ba kynsai tam la ïoh ban rah da u rangïalehkai jong ka Ïewpomtiah u Banïaisahlang kharrngi.
Katba u Andrew Mawthoh u rangïalehkai jong ka Mawpynthaw u la ïoh ïa ka khusnam kum u ranglehkai ba ïoh thep bun kol tam ha kane ka lympung lehkai ha kaba u la ïoh ban thep haduh 9 goal ha kane ka lympung naduh kaba sdang haduh ba ban da poi sha ka final.
Ka Ïewpomtiah Sports Social and Cultural Club ka la khur ïa ka song khusnam kaba long ka 20 hajar tyngka ha ryngkat bad ka trophi katba ka Mawpynthaw Sports Social bad Cultural Club ka la rah ïa ka song khusnam kaba long 10 hajar tyngka.
Hadien kane ka jinglehkai u Bah Ardent u la pynhiar noh ïa ka lama kum ka dak ka jingpynhap pyrda noh ïa kane ka lympung lehkai jong u snem 2023.
