Hadien ba dawa dorbar kyrpang ka KHNAM bad VPP shen yn ïatai sani sa ka Congress

Halor ka Reservation Policy

0

Shillong, Iaiong 8 : Hadien ba ka KHNAM bad ka VPP ki dawa ban khot ïa ka Dorbar ba kyrpang ban ïatai sani bha halor ka Roster System ne jingpynrung kam kat kum ka Reservation Policy kumba la pynpaw da ka ïing Bishar High Court jongka jylla ba ïa ka rukom pyntreikam ïa u snem dei ban ïatai sani bad shim rai da ka ïing Dorbar Thawaiñ ka jylla, ha kaba yn ïa mynjur lang naduh ki Liang Pyrshah `haduh ki Liang Synshar khnang ban lait kano kano ka jingsngewïapher hadien habud, mynta sa ka Congress ruh shen kan sa khot ïa ka CLP ban ïakren sani bha halor kane ka kam shwa ban shim ïa kano kano ka rai.
Haba ïakren bad u Nongïalam ka Congress Legislature Party (CLP) u bah Ronnie V Lyngdoh MLA ka Mylliem, u la ïathuh ba shen un sa lum ïa ka jingïalam jongka CLP ba ka Congress kan sa ïatai sani shen ïa kane ka Reservation Policy khamtam ha kaba ïadei bad ka Roster System.U la ïathuh ka CLP ka lah ban ïa kynduh ha ka Sngi Ba Ar lane ha ka Sngi Balang.
“ Ngin ïamir jingmut lang kum ki MLA jongka Congress halor kane ka Roster System bad hadien kata ngin sa shim ïa ka rai” ong u bah Ronie.
U la ïathuh ha kane ka jingïalang jongka CLP yn ïakren ruh halor kiba bun ki mat kiba ktah ïa ka jylla. U la ong dei tad hadien ba la dep ïatai sani yn sa lah ban tip kaei ka nongrim ba ka Congress kan ïeng halor ka Reservation Policy.
Lah ban pynkynmaw ba ka KHNAM bad ka VPP ki la dawa ban khot pynlong ïa ka Dorbar Kyrpang hadien ba ka ïing bishar High Court ka la pynmih ïa ka jingbthah kaba la kren shai kdar ba halor ka jingpyntreikam ïa u snem na ka bynta ka Roster dei ban ïatai sani bha hapoh ïing Dorbar Thawaiï namar ia ki kam thaw aiñ la dei ka kam jongka ïing Dorbar bad ka Sorkar.
Ha kaba ïadei bad ka Roster ruh la dei ban ïatai sani bha hapoh ka ïing dorbar thawaiñ.
Lah ban pynkynmaw wat ka KSU ruh ka la dawa na ka sorkar ban ym pyntreikam ïa ka Roster System naduh u 1972 bad ka jingpyntreikam ka dei ban long naduh nangne shakhmat.

Leave A Reply

Your email address will not be published.