Khlad noh u Bah Sumar Sing Sawian, u nongthoh khubor ba paw ka Jylla

0

Shillong, Ïaïong, 08: U Bah Sumar Sing Sawian uba long u nongthohkhubor ba la rangbah bha bad uba long ruh ha kajuh ka por u nongthohkot u la khladnoh ha ka sngi Thohdieng mynta ka taiew ha ïing sah ha Umroi Laban Saro, Ri Bhoi District.
Ïa u Bah Sumar la kha ha ka 15 tarik, Jylliew 1941 bad u la khlad noh na kane ka sla pyrthei ha ka rta kaba 82 snem.
Kum u nongthohkhubor u Bah Sumar u la long u Editor jong ka kotkhubor Apphira bad u la noh synñiang shi katdei eh lyngba ki jingthoh jong u sha kiwei pat ki kotkhubor nalor ba u ju don bynta bad ka All India Radio, Shillong, ka Doodarshan Kendra, Shillong ha kaba ïadei bad ki kam pathai khubor.
Ka jingkhladnoh jong u Bah Sumar ka la long ka jingduh kaba khraw haduh katta katta ïa ka jaidbynriew namarba u dei uba briew uba tip thik pa thik ïa ki kyntien khasi paka bad uba ju thoh ruh shaphang ka jingriewspah jong ka kolshor tynrai u Hynñiew Trep Hynñiew Wasa.
Kum u nongthoh kot u la pynmih ïa ka kot kaba u la jer kyrteng, ‘Ki khun ki hajar na jingkieng Ksiar, Ka Jutang.
U la pynkylla Khasi ruh ïa ka Gitanjali ba la thoh da u Rabindranath Tagore bad u la thoh bun tylli ki kot jingrwai poitri.
U la long u Chief of Bureau jong ka Shillong Press Trust of India (PTI) bad u la long u Khasi banyngkong eh ban bat ïa kane ka kyrdan.
Ha u snem 2017 ka Sorkar Jylla ka la ithuh kyrpang ïa ki kam kiba u Bah Sumar u la noh synñiang ha ka thoh ka tar Khasi da kaba pynkup burom da ka khusnam Tirot Sing Award ha sngi rakhe ïa ka Meghalaya Day.
U Bah Sumar u la ïoh pdiang ruh bun tylli ki khusnam ha ka kam thoh kotkhubor bad ha ki kam ka imlang ka sahlang.
U dei ruh uwei na ki nongmait lynti ban pynsdang ïa ka rongbiria da kaba pynlong ïa ka jingïakop siat khnam ïa kaba la ju pynlong da ka Apphira Archery Committee.
Nalor ka thoh ka tar, u Bah Sumar u la noh synñiang sha ka imlang ha kiba bun rukom bad u la long ruh u nongprat lynti da kaba thaw ïa ka komiti kumno ban shna ïa u durmot jong u Myllung SoSo Tham uba don mynta ha phyllaw jong ka State Central Library.
U dei u dkhot ba shitrhem jong ka Seng Khasi (Kmie) Mawkhar uba la bat kum u Secretary ba nyngkong jong u Lum Sohpet Bneng Committee bad uba la long uwei na ki nongïalam jong ka Seng Khasi (Kmie) ban ïalam ïa ka jingkiew sha u Lum Sohpet Bneng ïa kaba la tip kum ka ‘Kiew Pyneh Rngiew.’
Ka Shillong Press Club (SPC) ka la pynpaw ïa ka jingsngewsih halor ka jingkhladnoh jong u Bah Sumar bad ha ka sngi Saitjaiñ la pynlong ïa ka jingïalang sngewlem ha ka shlem treikam jong ka Shillong Press Club bad ka jingsngap jar kaba ar minit kum ka dak ka jingburom ïa ka mynsiem ba la khladnoh jong u Bah Sumar uba la iehnoh thylli ïa ka kam thoh khubor hapdeng ki paralok nongthoh khubor jong ka jylla Meghalaya.
Ka Meghalaya Editors’ and Publishers’ Association (MEPA) ka pynpaw ïa ka jingsngewsih kaba khraw halor ka jingkhlad noh jong i Bah Sumar Sing Sawian iba long u nongthoh khubor uba la rangbah bad iba la noh synñiang shibun sha ka kam pathai khubor ha ka jylla. Ka jingkhlad noh jong i ka long ka jingduh bakhraw ïa ka kam thoh khubor ha ka jylla.
Halor kane ka jingjia basngewsih, na ka liang ka MEPA ka phah ïa ka khubor sngewlem ïa ki bahaïing hasem jong i Bah Sumar bad ngi duwai ba u Blei un ai ka jingtngen ha kum kane ka por ba sngewsih, ong u kyrwoh ba la phah da u General Secretary jong ka MEPA u John W. Thabah.
Ïa ka met ba dang sah jong u Bah Sumar ynda la pyndep ïa ka lehniam leh rukom ha ingsah jong u ha Laban Saro, Umroi lashai ka Sngi U Blei yn sa wanrah sha Jaïaw Jingthang Briew.

Leave A Reply

Your email address will not be published.