Guwahati, Ïaïong, 08: Ka President jong ka India, ka Droupadi Murmu ka la long ka kynthei kaba ar ban ïoh shong ïa ka liengsuiñ ïapom Sukhoi 30 MKI ha Tezpur Air Force Station ha Assam ha ka sngi Saitjaiñ.
Ka President kaba long ka khliehduh jong ki kynhun ïada ri, ka la shong kumba 30 minit ha kane ka liengsuiñ ïapom kaba la her ha ki jaka Brahmaputra bad Tezpur na kaba la ïohi ïa ki lum Himalaya shuwa ban leit phai sha kane ka Air Force Station.
Ïa kane ka liengsuiñ la pynher da u Group Captain Naveen Kumar, uba long u Commanding Officer ka 106 Squadron. Kane ka liengsuiñ ka la her ha ka jingjrong kaba 2 kilometer palat ka jingjrong ka duriaw bad ha ka jingsted kaba kumba 800 kilometer ha ka shi kynta. Ka President Murmu ka dei ka President kaba lai bad ka President longkmie kaba ar ban leit shong liengsuiñ.
Hadien kane, ha ka kot kaba kyrpang na ka bynta kito kiba wan sha kane ka jaka, ka President ka la batai ïa la ki jingsngew ha kaba ka la thoh, “Ka la long ka jingshem kaba sngewtynnad bha ïa nga ban shong ha ka liengsuiñ kaba khlaiñ ka Sukhoi-30 MKI Fighter Aircraft jong ka Indian Air Force.
“Ka long ka jingsngew sarong ba ka jinglah ïada ri ka India ka la kiew shibun shah ban peit ïa baroh ki jaka kiba kynthup ïa ka khyndew, ka lyer bad ki duriaw. Nga ai khublei ïa ka Indian Air Force bad baroh kawei ka kynhun jong ka Air Force Station Tezpur kiba la pynbeit ïa kane ka jingpynher ïa kane ka liengsuin,” ong ka President Murmu.
La batai ruh ïa ka President shaphang ki jinglah treikam ki liengsuiñ jong ka Indian Air Force (IAF) bad ka la ong ba ka la hun ïa ka jingpynkhreh jong ka IAF ban treikam.
Ka jingleit shong ka President ha ka Sukhoi 30 MKI fighter aircraft ka dei shi bynta ki sienjam jong ka ban ïakren bad don jingïadei bad ki kynhun ïada ri, kum ka khliehduh jong ki kynhun ïada ri.
Ha u Lber 2023, ka President ka la leit jngoh ïa ka INS Vikrant bad ka la ïakren bad ki ophisar bad ki nongñiah lieng kiba trei ha kane ka lieng ba shna hi hapoh India.
