Sdang ka noh kjat Shad Suk Mynsiem ba lai sngi ka Seng Khasi Kmie ha Weiking

0

Shillong, Ïaïong, 08: Ka Shad Suk Mynsiem ba lai sngi ba ju pynlong shisien shisnem da ka Seng Khasi Kmie, Mawkhar Shillong, ka la sdang ha ka sngi Saitjaiñ.
Ha kane ka sngi sdang, da ki spah ngut ki nongshad kynthei bad shynrang bad kumjuh ki khynnah ba dang rit ki la poi ban ïashim bynta ban pyniphuh iphieng ha ka Lympung Weiking.
Ïa kane ka sngi basdang jong ka shad, la juh tip ïa ka kum ka shad Nohkjat bad ha shwa ban hiar sha Lympung Weiking, ka la don shwa ka jingïalum lang ki nongshad lem bad ki parakur parakha bad baroh ki dkhot nongkitkam ka Jylli Pyrkhat Kam (JPK) ha phyllaw jong ka hall ka Seng Khasi Kmie ha Mawkhar.
Ha ka por 1:30 nohphai sngi, ki duhalia ki la sei ka ksing ka nakra ka tangmuri ban sdang ban tem ïa ka ksing Lumpaid bad hadien kane u Asst. General Secretary jong Seng Khasi Kmie u Rgh Païa B Synrem u la shim ïa ka bynta ban pynïaid pat ïa ka jingïalang katba General Secretary jong ka Seng Khasi Kmie u Rgh Hainess Marbaniang u ïalam ïa ka jingduwai bad hadien kane la sdang pat ka jingïaid kjat sha Lympung Weiking.
Ynda haba la poi ha Lympung Weiking, shwa ban sdang ka shad Nohkjat, la pynlong ïa ka nguh ka dem kaba la pyndep da ka Komiti u Tymmen u San jong ka Seng Khasi Kmie bad ka jingkyntiew ïa ka lama ka Seng Khasi da u Rgh O. Pyngrope uba long u Vice Prresident.

Leave A Reply

Your email address will not be published.