Ka samoi Shad Suk Mynsiem ka la poi, kaei-kaei kaba ngin dang ïa puh-soi ka long ha ki Phawar pynngam jingmut. Kumba ka long ka Shad Ainguh ïa la U Long-Blei, Ba Lah-ei hi tang Marwei ïa Shi tyllup Pyrthei, nga la sngew kynduh jingmut, ban da kyrsiew jingrhem jingsngew ha baroh u Paid Khasi Baïar da kaba pashat ïa ine i Phawar duwai kyrpad-kyrpon kum ka khubor shaphi baroh. Ka Phawar hi ka dei ka kmie jong ka Khasi Poitri bad ka buit sian stad jong ki Longshuwa jongngi, ka Nongkynti-hok jongngi ban pynim-pynkhie ïa ka thoh-ka pruid. Ki Tymmen Longsan jong ka Seng Khasi jongngi kim shim la ïeh khun swet ïa ngi, ban ym ïa tih-ïa sei , khnang ba ka Pyrthei tip-lut ba mynta, kan hap ban bishar peit-thuh ïa ka bad wad ïa kata, ka jingshisha.
Kane ka Phawar duwai nga la thoh ha ka snem 2018 – ‘Ka Shad Suk Mynsiem’, mynba la wan ka jingsngew mynsiem ïeit ïa la ka Ri bad ka Jaitbynriew. Ka long kumne:
Ah! Muluk- Jaka jongngi, (2)
Da Jingsuk, Ah! Blei to ri –
Da weng Lyngkhuh – Pakhuh;
Theh kyrhai ka Jingpahuh.
Hoi – Kiw
Ah! Kynjat Samoi da Sneng, (2)
Ka Lynsher Aiom to weng
Blei-Kynrad pynkiar ïa shem;
Kat nang ïaid ki Sngi-ki Snem.
Hoi – Kiw
Ah! Koit-Khiah ba ngin ïa shem, (2)
Lad – lynti ruh nang pynïeng
Shad – Ainguh ha Me! Ngi dem;
Sngew mynsiem to iai pynrhem.
Hoi – Kiw
Ah! Kur – ki kha ban roi – ban bha, (2)
Weng thaw- wit, ki jingbakla
Ha Duwai ngi ïeng mynta
Ban ïoh lait na ka Sapra.
Hoi – Kiw
Ah! Ban kamai ïa ka Hok, (2)
Ka nongrim ka ai pynshok.
Wat nud ho paralok!
Da lamler, ka thok, ka klop.
Hoi – Kiw
Ah! Ïa shad- ïa kmen phi teh, (2)
Da ki kam pynsah – pynneh
La ïar baroh ïa beh,
Na kor-bah sha Lympung heh.
Hoi – Kiw
Ah! Kynmaw burom ngi theh, (2)
Lama-Seng kan ïai- kaweh
Dei maphi, kiba la teh
Ba tynrai nylla, kan neh.
Hoi – Kiw
Ah! Tip-briew bad ka Tip-Blei, (2)
H’u Khasi ki dap ki shlei.
Burom – Akor shaei?
Wat ïa shah! ïa ka bym dei.
Hoi – Kiw
Ka Jingsneng ha ki long shynrang-kynthei Khasi kiba nga la thoh:
‘Kha-ra- ïa’ wat ai kin ong, (2)
Ki ‘khabah junom phin long.
Pynkhia la i jinglong,
Kumba khia Ka Riam shi-rong.
Hoi – Kiw
Ka kor te ka jinglong, (2)
To da tieng ïa ka Lehmon
Shi bor wat la phi long,
Phin suhsieng ‘tiew-la-subon.
Hoi – Kiw
Ar-bor ha ar-kyrdan (2)
Dei-ti hok to da ïa-lam
Burom keiñ kaba tam
Ha la jingmut pynngam.
Hoi – Kiw
Ryngkap ruh ka sdien (2)
Liang kadiang nadien.
Da lai khnam kiba sien
Deiti hok, ba phin kheiñ.
Hoi – Kiw
Da kumta, ruh ‘Ka Shad-Suk-Mynsiem’ ka la wan mih, wan paw, kum ka Shad Ainguh ïa la U Long Blei bad ka da shon la ka shap-ka Muhor ha la ka Jaitbynriew bad ki jingsaiñ pynwandur ïa la ki hok longbriew Khasi paka nylla, ka Burom-ka Akor ba bha, ban lait na ka tyndep-ka tyndai bad kyrsiew jingsngew- tympang ha ka tylli ‘wei lang u Paid Khasi Baïar, ha ki sur jong ki Hynñiew Ksing.
Khublei Shad-Suk-Mynsiem shaphi baroh.