Wat ibeiñ ïa ki nongpang TB, dei ban ai mynsiem ba kin koit kloi: Dr. R. Basaïawmoit
Shillong, Ïaïong, 08: U District Tuberculosis Officer jong ka West Khasi Hill District u Dr. R. Basaïawmoit, u la kyntu ïa ki paidbah ha ka imlang ka sahlang ba kim dei ban isih ne ban ñiewbeiñ ïa ki briew kiba don ïa ka jingpang Tuberculosis hynrei ki dei ban ai jingkyrshan bad ban ai mynsiem ïa ki, ba kin lait na ki jingsngewsih bapher bapher.
“Ngim dei ban isih ne ban ñiewbeiñ ïa ki briew kiba don ïa ka jingpang Tuberculosis hynrei ngi dei ban ai jingkyrshan lem khnang ba kin ïoh mynsiem ban ïakhun pyrshah na ka jingpang bad ba kin ïoh kham kloi ïa ka jingkoit,” ong u Dr. Basaïawmoit haba kren ha ka jingrakhe ïa ka World Health Day ba la pynlong da ka ophis jong ka State Tuberculosis ha ryngkat ka jingïatreilang bad ka ophis jong u District Tuberculosis Officer ka West Khasi Hills District kaba la long ha sor Nongstoiñ ha ka sngi Palei.
U Dr. Basaïawmoit u la ai jingbatai bad pynshai ruh sha ki paidbah shaphang ka jingpang TB, ïa ki dak ki shin ba ki paidbah ki dei ban tip haba ki ïoh ïa kane ka jingpang bad ba kumno ki dei ban leh khnang ban ïada ïalade ban lait ban na ka jingïabit ïa ka jingpang TB kum ka jingdeng tista ïa ki mask, ban sumar khuid ïalade bad ban kiar na ka jingbiah pathar.
Ha kane ka sngi, ka State Coordinator jong ka State TB Office ka Kong Tracy Kharkamni ka la ïashim bynta lang ban pynsngewthuh ïa ki paidbah kumno ban sumar ïalade ban lait na kane ka jingpang kumba ka Sorkar ka la buh hakhmat ïa ka thong ban pynkut noh ïa ka jingpang TB ha kaba kut jong u snem 2015.
Ban pynsngewthuh shuh shuh ïa ki paidbah, ki samla pule jong ka Social Work Department, Women’s college Shillong ki la ïashim bynta ha ka street play ba la sakhi da ki nongshong iew bad ki nongthied nongpet.
Ki paidbah kiba la wan sngap ïa kane ka jingpynshai jong ka ophis u District Tuberculosis Officer ki la ïohlad ban kylli jingkylli shaphang ka jingpang Tuberculosis.
Shwa ban pynkut ïa kane ka prokram, ka ophis jong u District Tuberculosis Officer ka la sam ruh sha ki paidbah ïa ki kot lyngkdop kaba la thoh halor ka phang “Ka TB ka pynïap namar ka jingkheiñ sting bad ka jingleh klet,’ bad ka jingsam ïa ki khusnam sha ki paidbah kiba la ïashim bynta lang ha ka shut jabieng halor ka jingpang TB.