U Bah Sumar Sing Sawian u dei u rishot bah jong ka Seng: Seng Khasi Kmie

0

Shillong, Lber 08: Ka jingkhlad noh jong u bah Sumar Sing Sawian ha ka janmiet jong ka sngi Thohdieng ka la long ka jingduh kaba khraw ïa ka seng Khasi namar ba une u Rangbah u dei u rishot bad u dkhot barim ha ka Jyli pyrkhat kam jong ka seng Khasi la bun bun snem tad haduh ba un da leit bam kwai ha dwar u Blei.
“U Rangbah Sumar Sing Sawian, u dei u rishot, u bah tympan bad u pynïar jong ka Seng Khasi Kmie da ki bun bun tylli ki snem, u la long u Dkhot barim jong ka Jylli Pyrkhat Kam (JPK) jong ka Seng Khasi Kmie da bun snem bad uba la trei borbah ban pynneh pynsah, pynphuh pynphieng bad pynïar ïa la ka Niam Tynrai lyngba ki jingthoh kiba mih na ka mut ka pyrkhat pyrkhat ka jong u. Kum u Dkhot jong ka Literary Committee, Seng Khasi Kmie, une u rangbah, u la synñiang shibun ki jingthoh ha “Ka Sneng Khasi” bad u la long u Dkhot jong ka Editorial Board ha man la ki khep ba ka Seng ka pynmih ïa ki Thup Sah Kynmaw. U Rangbah Sumar Sing Sawian, u ïai pynshai lyngba ki kot khubor ïa ki matti bad nongrim jong ka Seng ha man la ki khep,” ong ka kyrwoh na ka Seng Khasi Kmie.
Ka ban sah kynmaw ha ki pateng pakit jong ka Seng Khasi Kmie, ka dei ka jingsngewthuh bad shemphang jong une u Rangbah ha kaba ïa dei ban ki parom shaphang jong U Lum Sohpetbneng uba kyntang. U la long uwei na ki rangbah kiba donkti naduh ba sdang ban pynïoh ïa ka kliar jong u Lum Sohpetbneng bad ka Seng ka la thung ïa u kum u Secretary ba nyngkong eh jong ka Lum Sohpetbneng Committee, Seng Khasi Kmie naduh ba la thaw ïa ka, ha ka 30 tarik u Ïaïong, 1990 bad u la bat da bun bun snem bad u la long ruh u Chairman barim jong kane ka Committee. Hapoh ka jingïalam ka jong U, la lah ban pynlong ïa ka Kiew Pyneh Rngiew ba nyngkong eh ha kliar u Lum Sohpetbneng ha ka 20 tarik u bnai Rymphang 2000. Ha kaba ki khun ki hajar ki it ki hima ki elaka jong ka ri Hynñiewtrep ki la wan ban ïa shim bynta.
Kum shi bynta ban pyrto ïa ki kam ba khraw jong une u Rangbah, ka Seng Khasi Kmie, ka la pynkup burom ïa une u Rangbah, ha ka jingrakhe ïa ka Seng Kut Snem kaba la long ha ka 23 tarik Naiwieng , 2022.
“Ha kum kane ka por kaba ka ïing ka sem ka ïa kynduh ïa kum kane ka jingjia kaba sngewsih, ka Seng Khasi Kmie ka phah ïa u kyrwoh sngewlem sha ki khun ki kti, kiba ha ïing ha sem jong une u Rangbah. Ngi buh lang ruh ïa ka kyrpad kyrpon, ka duwai ka phirat ba ka mynsiem ksiar mynsiem rupa ka jong une u Rangbah ba la leit bam kwai ha dwar U Blei ba kan poi suk poi saiñ bad la ki dot ki ïaw bad ba ka rngiew ka rwiang kan synran synriah bad aibor aibuit ïa baroh kiba don ka jingïadei kaba jan bad u,” ong shuh shuh ka kyrwoh.
Kum shi bynta ban kynmaw burom ïa ka jingkhlad noh jong u Rangbah Sumar Sing Sawian ka seng ka la pynlong ïa ka jingïalang sngewlem ha ka step jong ka 8 tarik u Ïaïong, 2023, ha Seng Khasi College, Jaïaw ban pyrto ïa u synñiang u bynhei uba une u Rangbah u la noh sha ka Seng ha kiba bun ki liang bad ka jingïalang ka la pynlong ïa ka jingsngapjar kaba shipor kum ka dak ka jingburom ïa une u Rangbah bad ban duwai ruh na ka bynta ka mynsiem ka jong u.

Leave A Reply

Your email address will not be published.