Ba tbit palat ïa ka jingpule da ka kopiwtor ai sngewbha ka RKM ïa ka Samla Ibansara Jyrwa

Shillong, Ïaïong 08: Ka Ramakrishna Mission Vivekananda (RKM) Cultural Centre, Shillong ha ka sngi Saitjaiñ ka la pynlong ka jingpynkup burom ïa ka Batch kaba 99 jong kiba shah hikai Computer bad ka batch ba 38 jong ki samla ba pule ïa ka ktien ka thylliej ha kaba napdeng kiba shah hikai ha ka jingpule kompitor dei tang ka Samla Ibansara Jyrwa kaba la ïoh da ka kor kompitor namar ka jingtbit jong ka ha kane ka laiñ.
Ha kane ka jingïalang, ka centre ka la sam 500 tylli ki syrnot sha ki samla pule computer bad ka ktien ka thylliej kiba la leh bha. Ka Ramakrishna Mission, Shillong, ka ai jinghikai kumba 6000 ngut ki samla ha ka shi snem ha ki sobjek Computer, ba la pynlong ha palat san bynta.
Ka jingpynkup burom kaba mynta ka sngi kadei na ka bynta ki shah hikai jong u bnai Rymphang- Lber 2023, ki shah hikai jong ka batch ba 99 ki kynthup kumba 700 ngut ki samla na ki bynta bapher bapher jong ki jylla ka thaiñ shatei Lammihngi.
Ki samla kiba wan shakhmat ha ka jingpule Computer-Beginner – Longmai Gashnga, Computer-Intermediate Janak Chetri, Computer – Accounting: Chiteej Kumar Ram bad Laweibakordor Thongni, Database (Part I): Richarldy Dkhar, DTP – Mawanshwa Warjri, Web Designing – Deidaphi Kharmaw, Expert – Meba-ai Shisha Syiem, bad na ka liang ka center ka la ai sngebha ïa kine ki samla da ki memento bad na baroh kiba ïoh syrnot bad memento dei tang ka Samla Ibansara Jyrwa kaba la ïoh ruh bad ka kompiwtor namar ka jingtbit ba tam duh .
Ka samla ba la leh bha bad wan shakhmat ha ka jingpule English kalong ka Tuberlin Jyrwa ha kaba na ka liang ka center ka la ai sngebha ïa ka da ka memento.
Ka Dr Moushumi Dey, Lecturer, Women’s College, Shillong, ka la plie ïa ka jingïalang kum ka kongsan.
Haba ai jingkren ha ka jingïalang, ka Dr Moushumi ka la ong ïa ki samla ba ki long kiba donbok bha ban ïoh jinghikai ha kane ka jaka. Ka la ong ba ngi kiew khyndiat pa khyndiat ha ka jingim. Ka jaka ai jinghikai bad ki samla pule ki ïa kiew lang man la ka sngi da ka jingïalam lynti jong u Maharaj bad ki nonghikai.
“Ha kane ka juk ba mynta ka jingpule kaba katkum ka sap kalong kaba kham kongsan shuh shuh ïa ka jingpule ha ki skul bad kolej. Kumta da kaba ïoh jinghikai pyntbit ha ka Computer bad ka ktien ka thylliej kalong kaba kongsan bha bad kan ïarap ïa phi ki samla ha ki lad ïoh kam ïoh jam,” ong ka Deb,
“Ieng, khie bad wat sangeh huduh ynda la kot ïa ka thong,” la sot ka Deb na ka jingkren jong u Swami Vivekananda ha ka jingkren jong ka.
Hashuwa kane ha ka jingai jingkren jong u ha ka jingïalang plie, u Vairagyachaitanya Maharaj, Deputy in charge jong kane ka jaka ai jinghikai, u la ai khublei ïa baroh ki samla pule bad kyntu ïa ki samla ban pdiang ïa ki jinghikai jong u Swami Vivekananda ban ïoh jingjop ha ka jingim bad ong ba u briew udei u nongthaw ïa la ka jong ka nusip.
Shuh shuh u la ban jur ïa ka jingdonkam jong ka jingpule bad pynshlur ïa ki samla ba kin don ka mynsiem ban long ki nongseng kam lajong ban ïa kaba ap ïa ki kam sorkar.
Ha kane ka sngi la pynlong ruh ïa ka jingsngapjar ba shiminit ban sngewlem ïa ka jingkhlad noh jong u nongthoh kot ba pawnam ka jaidbynriew bad ka jylla u Bah Sumar Sing Sawian, uba ju don bynta ruh ban pynbit pynbiang ïa ka magazine ‘Kajingshai’ ba ju pynmih na kane ka center.