Shillong, Ïaïong 08: Ka Federation of Khasi, Jaiñtia and Garo People (FKJGP) Riwar Mihngi Circle ha ka sngi Palei ka la leit ban ujor ha u Sub Divisional Officer (SDO) jong ka Pynursla Civil Sub Divison pyrshah ïa ka kompeni ARSS Infrastructure Projects Limited kawei na ki kompeni ba pyntrei ïa ka surok Shillong-Dawki namar ka jingpyntrei torti jong ka.
Ha ka shithi sha u SDO (C) ka FKJGP ka la kdew ba ka jingpyntrei torti kane ka kompeni ïa ka jingpyntrei ïa kane ka surok ka buh jingma ïa ki nongshong shnong kiba don kham sha rum jog kane ka surok ba dang tih ban kham pynheh.
“Kane ka jingtrei torti kane ka kompeni lah ban sakhi tang da kaba shu peit ïa ki rukom trei jong ka ha lynter ka surok kaba hap hapoh ka shnong Rngaiñ bad terter. Shuh shuh ngi ïohi ba ka jingap jingma lada kane ka kompeni ka trei khlem pyrkhat ïa ka jingsngaiñ jong u paidbah ba ïaid ba ieng,” ong ka shiti ka FKJGP sha u SDO.
Haba kren bad Mawphor u Information Secretary ka FKJGP Riwar Mihngi Circle u Bah Evanfield Khonglam u la ïathuh ba kane ka jingshim khia ka seng ba ujor ka dei namar ka jingtih torti bad ka jingbret khyndew torti kane ka kompeni kan buh jingma ïa ki paidbah kiba rem sha ki jaka rep ba kham sha rum namar ka la dei ka aiom slap.
“Wat ha ka aiom bym dei ka aiom sla ka ju don ka jingtwa khyndew mynta lei ba la tih torti bad bret pathar ïa ka khyndew bad ki maw kiba tih kan buh jingsyier shibun ïa ki nongrep ha ki jaka rep jong ki namar kumba phi tip ha ka aiom Lyiur ka jingther u ‘lapbah ka jur bha ha kine ki shnong bad ki thaiñ bad kan long ka jingbuh jingma shibun ïa ki nongrep.” u la ong.
“Ngi khmih lynti ba ki bor ba dei khmih kin leh ïa kaba donkam namar ha ka shiti ujor ngi la suh lang ïa ki dur ba kin long ki sakhi satar ïa ka jingtrei jong kane ka kompeni tih surok,” bynrap u Bah Evanfield Khonglam.
