Khliehriat, Jymmang 25 : U bah Wanshwa Suting, uba na ka shnong Khliehriat West, u dei uwei na ki kaitor na ri lum Jaiñtia bad ïa ka Music Video jong u “Da slem ki Por’ la pyllait paidbah hynnin ka sngi da u Kongsan, u bah Skhem Dkhar bad la ia don ryngkat lang u bah Rinaldus Dkhar, kum u Symbud kongsan, u bah Sambormi Lyngdoh, President EJNC, u bah Kyrkhumeki Nongtdu bad kiwei kiwei ki riew rangbah.
Haba kren kum u Kongsan, u bah Skhem Dkhar u la ai ka jingkhublei kitbok kitrwiang ia u kaitor u bah Wanshwa Suting ba un nang iai kiew shaphrang ha ka sap kaba u don, kumjuh ruh ban long kum ka jinglam lynti ïa ki khun samla ba kin pyndonkam ïa ka sap kaba ki don.
U bah Wanshwa, u la kyntu ïa ki khun samla ba ki dei ban pyndonkam hok ïa la ka jong ka sap ba ki don, ban long ruh kiba shlur ban mih sha khmat, ban long ruh kiba trei shitom ban kyntiew ïa ki sap ki phong, ha kajuh ka por u kyntu ïa ki paidbah ba kin sngewbha ban like bad subscribe ban long kum ka jingkyrshan bad ai bor ai mynsiem ban pynmih shuh shuh ïa ki music video. U la ai khublei ruh ïa baroh kiba la ia wan ban ïa don ryngkat lang ha katei ka sngi ba la pyllait ïa ka music video kaba la pynlong ka Khliehriat West Community Hall.
