Mih ki khynnah skul ka Balang ban pynkhuid ïa ki surok ka Dorbar Shnong Khimusniang

Jowai, Jymmang 25: Ki Khynnah skul jong ka Khimusniang Presbyterian Higher Secondary School, Jowai mynta ka sngi kila mih shitrhem ban pynlong ïa ka jingpynkhuid ïa ki ñuit ki ner kiba don ha shi lynter ki rud surok kiba hap hapoh ka Dorbar Shnong Khimusniang (DSK) Jowai.
Ïa kane ka jingpynkhuid ban tam ïa ki ñiut la lam kham da ka Headmaster jong katei ka skul ka kong Widawan Nangleiñ ha rynkat ki nonghikai bad ki khynnah skul, shuh shuh na ka liang ka kong Nangleiñ kala ïathuh ba ka jingpynlong ïa kane ka prokram pynkhuid shnong ka long shi bynta ban rakhe ïa ka World Environment Day kan ban sa long ha ka 5 tarik jong u bnai Jylliew.
“Kum ka skul Balang ka don ïa ka thong kaba hakhmet eh ban wanrah ïa ka jingkhuid jingsuba ym tang ha ki phyllaw jong ka skul hynrei ngi la mih sha bar kumjuh ban pyni nukas ba ki paidbah nongshong shnong ruh ki don ka bynta ban ïatreilang na ka bynta ka jingkhuid jingsuba hapoh ka imlang ka sahlang” ong ka kong Nangleiñ.
Kala ban jur ruh halor ka jingshah pynjulor jong ka mariang ha kiba bun ki liang naduh ka jingpom pathar ïa ki dieng ki siej kiba lah bna ktah shisha ïa ka suiñbneng ha ki sngi ban wan, halor kane ka bynta ruh ka la ong kala donkam bha ban pynrung ha ki jingmut jingpyrkhat jong ki khynnah skul halor kane ka bynta ban ïada ïa ka jingitynnad jong ka mei mariang.
Hadien jong kane ka prokram na ka liang ki khynnah skul kila pynlum pynlang shi jaka ïa ka ñuit na ka bynta ban pynkhuid ïa ki da kaba leit thang ha ki jaka ba la buh.