Pynbeit noh mardor ïa ka Reservation Policy, sawa ka sur ha ka rally jong ka Sur u Paidbah ka SWKH
Mawkyrwat, Jymmang, 25: Ka Sur u Paidbah jong ka South West Khasi Hills District mynta ka sngi ka 25 tarik u Jymmang, 2023, ka la ïoh ban pynlong ïa ka jingïaid paidbah (Rally) ha Mawkyrwat ban pynsngew halor ka Reservation Policy ha ka Sorkar bad kumjuh ruh ha ki MLA ba kin kren ei ei khnang ba ka rukom thung-kam thung-jam kan long kaba ryntih.
Kane ka rally ka long kum shibynta ba kyrshan ïa ka jingshong shah thngan jong u bah Ardent M. Basaiawmoit u President jong ka Voice of People’s Party (VPP), kawei pat ka long ban pynsngew ha ki MLA ba ki kren ei ei halor katei ka bynta bad ban dawa na ka Sorkar MDA-2 ba kan pynbeit noh ïa ka Reservation Policy hapoh ka Jylla Meghalaya.
Ha kane ka rally la wan snohktilang ruh ki samla pule jong ka Sngap Syiem College, Mawkyrwat, ki dkhot sengbhalang ba kynthup naduh ka HITO, ka HYC, ka HANM, ka Synjuk ki Seng Samla Shnong, ki longkmie, ki samla bad kiwei de kiba don mynsiem ban kyrshan ïa ka Sur u Paidbah jong ka South West Khasi Hills District.
Ki nongkren ha kane ka sngi ki la pynpaw ïa la ki jong ki jingsngew halor kane ka mat ba kongsan eh ba ka sorkar ka dei ban leh ei ei noh mar dor halor kane ka Reservation Policy khnang ba kan nym don kano kano ka jingnoh shilliang ha kaba ïa dei bad ka thung-kam thung-jam hapoh jong ka jylla Meghalaya. Shuh shuh ki nongkren ha kane ka sngi ki la pynpaw ruh ka jingkyrshan ba pura halor ki ar tylli ki mat ba kongsan ïa kaba ka Sur u Paidbah jong ka South West Khasi Hills District u la buh kata ka long ban kyrshan ïa ka jingmih shakhmat jong u bah Ardent M. Basaiawmoit ba u la shim ka rai ban shong shah thngan halor ka jingdawa na ka Sorkar MDA-2 ban pynbeit noh mar dor ïa ka Reservation Policy hapoh ka jylla Meghalaya bad kawei pat ka long ban dawa na ki MLA jong ka Mawkyrwat Constituency ba kim dei ban shu peit kai halor kane ka bynta hynrei lada ki don ka jingkitkhlieh ki dei ban kren ei ei khnang ba kan long ka jingmyntoi ym tang ïa ki samla jong ka mynta hynrei khamtam eh ki samla jong ka pateng ka ban wan ruh.
Kiba la ai jingkren ha kane ka sngi ki long na u bah Bitnam Nongsiej, President ka HITO Mawranglang Zone, u bah Lambokstar Marweiñ, President ka HANM, u samla Pynskhem Kharjahrin na ka HYC, u bah Wallam Syiemiong na ka Synjuk ki Seng Samla Shnong, South West Khasi Hills District, u bah Ailad Nongrem, u bah Overlin Imiong na Ranikor, bad u bah Pynkhraw Kharjahrin.