Nongstoiñ, Jymmang, 25: Namar ka jingkylla jong ka por bad ka jinglong jingman ha ka imlang sahlang, bun ki dak ki shin kiba la buh da ki longshuwa ki man shuwa kum ki maw nam, ki tiar ki tar ba ki ju pyndonkam khamatam ki stieh bad ki waitlam ïaleh thma bad wat ki jingbuh jingsat ruh ki la sdang ban jah noh suki pa suki.
Ha kaba ïadei bad katei ka phang u bah Lamphrang Dkhar uwei na ki riew rangbah ka shnong Marskuiñ, u la ong ba ka shnong Marskuiñ ka dei ka shnong kaba la don naduh hyndai hynthai bad ha ki jaka ba marjan bad katei ka shnong, ki don ki maw nam kiba don jingmut bha katkum ki khnana pateng ba la ïathuh da ki longshuwa. U la ong ruh ba ki dak ki shin kiba pyni lyngba ki maw kpep, ki maw thung, ki dang kynrei bha haduh kine ki sngi bad ki don ka jingmut kaba khia bha.
U bah Dkhar u la ong ruh ba kum u riew rangbah u don ka jingangnud kaba khraw ba ki stad wad bniah bad ki nongthoh kot, kin wan sha katei ka thaiñ ban leh ïa ka jingwad bniah lyngba kitei ki dak ki shin, ym tang ba kin lap ïa ka jingmut ba shisha jong ki. Hynrei ban wad bniah ruh ïa ka ktien tynrai jong ki nongshong shnong ha Marskuiñ, namar ka ktien ba ki long shuwa ki kren ka dei kaba eh haduh katta katta, ba ki nongwei kin sngewthuh bad wat ki para shnong kiba marjan ruh ki shem jingeh bha ban sngewthuh ïa ka ktien tynrai ki riew tymmen kiba mynshuwa eh ki kren.
