Jowai, Nailar 03 : U Deputy Commissioner (Supply), ka West Jaiñtia Hills District ula pynbna paidbah ba la pyllait ïa u Khaw Rashon na ka bynta u bnai August, 2022 hapoh ka West Jaiñtia Hills District, Jowai.
Ka jingsam ïa u Khaw AAY kan long 35 kilo manla kawei ka longïing shibnai ha ka dor Rs. 3.00 tyngka shi kilo, ïa u Khaw PHH yn sam 5 kilo shikhlieh shibnai ha ka dor Rs.3.00 tyngka shi kilo, katba ïa u Khaw Non- NFSA pat yn sam 7.215 kilo kawei ka longïing shibnai haka ka dor die lang kaba long Rs. 14/- shi kilo ha sor bad nyngkyndong.
Ïa u khaw PMGKAY(AAY) yn sam haka dor Rs 5 kilo shi khlieh briew haka shibnai ha sor bad nyngkyndong.
La kyrpad ïa ki paidbah lada don kino kino ki Dealer kiba die tam katkum katei ka dor ba la kdew haneng, ki dei ban ujor sha u Deputy Commissioner (Supply), ka West Jaiñtia Hills District khnang ba ka ophis kan pynshitom tyngeh ïa kiba donkti. La pyntip ruh ba ïa u khaw yn sam ha shwa ka 30th August 2022 ha baroh ki jaka sam rashon.
