Mawkyrwat, K’lyngkot 12 : Ka South West Khasi Hills District Volleyball Association ka la ïoh ban plie noh ïa ka lympung ïalehkai Volleyball ba la tip kum ka 4th South West Khasi Hills District Level Invitation Volleyball Tournament 2023 ha ryngkat ka jingïatrei lang bad ka ophis jong u District Sport Officer (DSO), South West Khasi Hills District kaba ki la pynlong hajan jong ka madan MDSA Mawkyrwat.
U kongsan ha kane ka sngi u dei u bah Forwardman Nongrem, President ka KSU, South West Khasi Hills District bad u ba la shim ruh ïa ka bynta ban wan plie pyrda noh ïa kane ka lympung ïalehkai Volleyball.
Ha shwa ban sdang ïa ka jingïalehkai, la ïoh ban pynlong ka jingïalang ba lyngkot ba la pynïaid da u bah Bankyrshan Lartang, Secretary jong ka South West Khasi Hills District Level Invitation Volleyball Tournament ha ryngkat da ka jingïadonlang ruh u bah Sherbok Marbaniang kum u symbud kongsan, bah Elevenson Wanniang President jong ka South West Khasi Hills District Level Invitation Volleyball Tournament bad kiwei de ki riew rangbah ryngkat ki nongïalehkai kiba la ïoh ban wan ïa shim bynta ha kane ka sngi sdang jong kane ka lympunng ïalehkai.
Ha ka sngi sdang la ïoh ban pynïalehkai hapdeng ka Nongkynbah A pyrshah ïa ka Mawkhyrwang B ha kaba ka Nongkynbah A ka la long ka nongjop da 2 set pyrshah ïa ka Mawkhyrwang B, hadien jong kine ki ar tylli ki kynhun la ïoh ruh ban pynïalehkai ïa ka Sarin B pyrshah ïa ka Jerlang, ha kaba ka Sarin ka la ïoh ïa ka nam jingjop da 2 set pyrshah ïa ka Jerlang.
Ha kane ka 4th South West Khasi Hills District Level Invitation Volleyball Tournament 2023 ki la don haduh 16 tylli ki kynhun ïalehkai volleyball kiba la ïoh ban wan ïashimbynta ha kane ka lympung ïalehkai Volleyball jong u snem 2023.
