New Delhi, K’Lyngkot 12 : Ka All India Football Federation (AIFF) ka la jied ïa u rangïalehkai barri ka India ba dei ruh u dkhot ka AIFF Technical Committee, u Eugeneson Lyngdoh kum u Honorary Project Head na ka bynta ka kynhun U-17 ki shynrang. Mynta kane ka kynhun ka pynkhreh ban leit aireng ha ka lympung AFC U-17 Asian Cup kaban long ha Thailand mynta u snem.
“Ngi shaniah ba ka jingdon u rangïalehkai ba kynsai kum u Eugeneson kan long ka jingmyntoi kaba khraw ïa ki nongïalehkai bad ka kynhun jong ki coach,” ong u Secretary General, u Dr. Shaji Prabhakaran.
Lah ban kdew hangne, hadien ba u la ïoh ban mihkhmat ïa ka India ha u 2015, u Eugene u la ïoh ban mih khmat haduh 24 sien ïa ka ri ha ka Senior National Team. Kum u rangïalehkai u Eugene u la dei ruh uwei na ki rangïalehkai ba kynsai ka kynhun ha ka jingjop ïa ka 2015 SAFF Cup bad ruh ïa ka 2017 Hero Tri Nation Series.
U kylla long ruh u rangïalehkai ba kynsai tam ka India ha ka jingjop jong ka ïa ka 2019 AFC Asian Cup.
Nalorkata, u Eugene u la ïoh ruh ban khur ïa ka khusnam AIFF Player of the Year ha u 2015. Haba phai pat sha ka jingïalehkai ha ki club, u Eugene u la don ruh ka bynta kaba khraw ha ka Bengaluru FC kaba la ïoh ban khur ïa ka nam lahduh ha ka 2015-16 I-League bad ruh ai ka 2016 Federation Cup nalorkata wat ban poi sha ka final jong ka 2016 AFC Cup.
Hadien ba u la shongthait na ka kam ïalehkai phutbol, utei u rangïalehkai u la ïoh ruh ban mihkhmat kum u MLA ka Mawphlang hadien ka jingkhlad noh u kpa jong u ha u snem 2021.
Lah ban kdew hangne, ka kynhun ïalehkai U-17 ka India kadei ban ïakhun paralok pyrshah ïa ka UAE-17 ha ka 16tarik mynta u bnai ha Dubai. Hadien kane, ka kynhun kan leit ruh ban ïakhun paralok ar tylli, kata pyrshah ïa ka Uzbekistan ha ka 22tarik bad ha ka 24tarik ha Goa.
