Shillong, K’lyngkot, 12: Hadien bun bun snem ba ka shnong Madanryting, East Khasi Hills District ka la thrang ban ïoh noh ïa la ka jong ka madan, mynta ka kynti, u Bah Ngaitlang Dhar uba dei u kpa jong u Bah Dasakhiatbha Lamare, u kyrtong ka National Peoples Party (NPP) na Nongkrem Constituency u la plie paidbah ïa ka madan kaba thymmai kaba ki la shna na ka bynta ka shnong Madanryting ha ka jinglut kaba kot 80 lak tyngka.
Ha kane ka sngi, la sakhi lang da u Bah Dasakhiatbha Lamare kum u kongsan, u Bah Ngaitlang Dhar kum u Symbud Kongsan, u Rangbah Shnong u Bah Holas Kharkongor, u Secretary Shnong u Bah Cyprian Kharkongor, ki dkhot ka Dorbar Shnong, ki dkhot ka Seng Kynthei, Seng Samla bad ki paidbah nongshong shnong.
Hadien ka jingplie ïa kane ka madan, la pynlong pat sa ïa ka jingïalehkai ha ki kyrdan ki bapher bapher bad ka jingpynkupburom ïa ki samla ïakura na ka shnong Madanryting kiba la jop ha ki jingïakhun ki bapher bapher ha ka Ri.
