Na u CM sha u Dr Mukul : Hato ka uniform AITC kan pynklet ïa ka jingbym ïoh kam ki samla ha ka sorkar MUA?

Shillong, K’lyngkot 11 : U Myntri Rangbah ka Jylla Conrad K Sangma hynne ka sngi Balang, ula buh jingkylli ïa ka jingbym lah jong ka Sorkar MUA ba ïalam da u Dr Mukul Sangma ban leh eiei halor ka jingbym ïohkam ki samla ka Jylla bad ula ong hato ka jingphong ïa ka jersey ka AITC kan pynklet ïa ki samla ba kim ïoh kam lane ïa ki paidbah ba ki dei ki juh ki nongïalehkai?
U Conrad ula kynthoh ïa kane halor ka jingkular ba dang shen jong ka All India Trinamool Congress (AITC) ban aikam ïa palat 3 lak ngut ki samla khlem kam lada ka shah jied ban wan ha ka bor hadien ka elekshon ban wan.
“Lada ki mut shisha, kila dei ban leh naduh ka sorkar MUA haba ki dang don ha ka bor hynrei ki khlem shim satia ïa kano kano ka sienjam lane leh eiei” ong u Conrad haba ïakren bad ki nongthoh khubor.
U ong ba kito kiba don ha ka Sorkar Congress (MUA) kila phong ïa ka jersey thymmai da kaba leit ïasoh bad ka AITC.
“Ki juh ki nongïalehkai ki phong da ka jersey thymmai bad kam ba ki dang thymmai. Nga tharai phra snem ki paidbah ka Jylla kila ïohi ïaka kam ba ki trei bad kumno ka ïoh ka kot bad ka jingeh ba ki mad” ong u Myntri Rangbah.
U Conrad uba dei ruh u National President ka National Peoples’ Party (NPP), ula kynnoh ba ka Sorkar Congress ba ïalam da u Dr Mukul kam shym la lah ban pynïoh pisa ban pyndep ïa kiba bun ki project, wat ïa ki project ba kila dep ban buh mawnongrim bad dep sdang ruh ïa ka jingtrei.
“Hynrei kane ka Sorkar kala lah ban pyndep lut ïa kitei ki project. Ka nuksa ba rit eh ka dei ka Ampati Water Supply Scheme bad lada phi peit ïa ka hadien bala mang tyngka, ka sorkar barim kala pyllait tang T.5 haduh T. 10 klur hynrei kane ka Sorkar ba mynta watla ka dei ka Constituency kaba mihkhmat da ki dkhot na Liang Pyrshah, kala shimkhia ïa ka jingeh ki paidbah ka Ampati bad theh haduh T.100 klur duna sha kane ka project” ula ong.
“Namar kata, ka long ka bym sngewthuh ba ki klet ïala ka jong ka por bad tang namar ba kila phong ïa ka jersey thymmai, ki sngew ba ki paidbah kin klet ba kim shym la lah ban leh ïa ki kam bad ban ai ka jingshakri ha katei ka por bad dei namar kane ka daw ba ki paidbah kila kyrshan ïaka jingkylla” ula bynrap.
U Myntri Rangbah ula ong ruh ba ki paidbah kila ïohi mynta ïa ka jingïaid shakhmat ka Jylla naba ka Sorkar kala wanrah ïa ki prokram bapher bapher ban ïarap ïa ki nongrep, ki seng longkmie, ki SHG bad kiwei kiwei ha kaba la lah ban aikam aijam ïa ki nongshongshnong.
“Namar kata, ban shu kren hi kam don jingmut eiei ruh em…baroh ki lah ban kren hynrei ka kam ka dei kaba kren dalade” ula ong.