Ym pat ïoh jingtip ba thikna ka Sorkar halor ka jingïap ki 3 ngut ha krem dewïong

Shillong, K’lyngkot 11: U Myntri Rangbah ka jylla u Conrad K Sangma ha ka sngi Balang u la ïathuh ba ka sorkar kam pat ïoh kino kino ki jingtip kiba thika halor ka jingsuba ïa ka jingïap jong ki lai ngut hapoh krem dewïong ha East Jaintia Hills.
“Ngim pat ïoh kino kino ki jingtip kiba thikna ne ki jingpynthikna halor kane bad ngi ruh ngi shu ïohsngew halor kane ka jingjia hynrei ngim pat ïoh satia kano kano ka kaiphot kaban pynthikna,” ong u Myntri Rangbah sha ki lad pathai khubor.
Katba na ka liang u SP kaEast Jaintia Hills, u Jagpal Singh Dhanoa u la ong ba ka don ka jingïap ki laingut ha ki ar tylli ki shnong kata ha Musniang rim bad Musniang hynrei ïa ka daw ka jingïap pat ym pat tip haduh kat mynta ba la thoh ïa kane ka khubor ruh.
Haba la kylli la kine ki lai ngut kiba ïap la lap ïa ka met jong ki na ki krem dewïong, u Dhanoa u la ong, “ngim pat tip haei ka jia kane ka jingjia ne ka jingïap kine ki lai ngut bad ngim tip la ka dei na ka jingkhyllem ka krem dewïong ne na kiwei pat ki daw ruh.
U la ong ruh ba ïa kine kiba la khlad la tep ha ka 9 Kyllalyngkot bad lada donkam ban leh ïa ka Post Mortem ki pulit kin sa peit ïa kane ka bynta.
“Ngi la pyrshang ban lum ki sabut bad lada donkam ban leh post mortem ngin sa leh bad ngi kyrmen ba kiba ha ïing jpng ki kin ai sabut halor kane,” u la ong.
U la ïathuh ruh ba dei tad ynda la lah ban thikna ïa ka daw ka jingïap jong kine ki lai ngut ba ki pulit kin sa wad sabut sa ïa ki trai par bad ka jaka ba jia kane ka jingïap jong ki.