Shillong, K’lyngkot, 11: Ar ngut ki MLA jong ka Trinamool Congress kiba kynthup ïa u Marthon Sangma bad u Jimmy D. Sangma ha ka sngi Balang ki la iehnoh ïa ka jinglong MLA da kaba ai ïa ka shithi iehnohkam ha u Lamphang ka Iingdorbar Thawaiñ ka Jylla u Bah Metbah Lyngdoh.
Kine ki arngut ki MLA kin sa pynïasoh bad ka National Peoples Party (NPP) lashai ka sngi Palei.
U Marthon Sangma u dei u MLA jong ka Mendipathar Constituency bad u Jimmy D. Sangma u dei u MLA jong ka Tikrikilla Constituency.
Dang shen ka Meghalaya Trinamool Congress ha ka jingpynbna ïa ka thup kyrteng jong ki 52 ngut ki kyrtong kam shym la pynmih satia ïa ka kyrteng jong u Jimmy D. Sangma hynrei katkum kane ka thup kyrteng la pynpaw ba u Mukul Sangma uba long u MLA jong ka Songsak un ïakhun hi da lade na Tikrikilla.
Ka TMC ka la sei bujli ruh da u MDC ka Garo Hills Autonomous District Council (GHADC) u Pardinand D. Shira na Mendipathar ha ka jaka jong u Marthon Sangma.
Ka AITC kaba shong ha ka Liang Pyrshah ka la hiar syndon jraiñ sha ka 9 ngut hadien ka jingmih noh jong kine ki arngut ki MLA mynta ka sngi Balang lem bad u Bah Himalaya M. Shangpliang uba la pynïasoh bad ka Bharatiya Janata Party (BJP).
Da ka jingiehnoh jong kine ki arngut bad kiwei pat ki MLA ïa ka jinglong MLA ka ingdorbar kaba don 60 ngut ki dkhot mynta ka la don sa tang 49 ngut.
Kum ban shu kdew hangne, dang shen u Bah Samlin Malngiang uba long u Myntri ka tnat PHE bad u MLA jong ka Hill State People’s Democratic Party (HSPDP) na Sohïong Constituency u la iehnoh ïa ka jinglong MLA bad pynïasoh bad ka National People’s Party (NPP) ha ka jingïalang kaba la long ha Sohïong, East Khasi Hill District.
La ïoh jingtip ruh ba u FW Momin uba long u MLA barim jong ka Mendipathar Constituency bad u nongïalam ka NPP u la lum jingïalang ïa ki nongkyrshan shwa ban leit pynïasoh bad ka BJP hadien ka jingïalang bad u Symbud Myntri Rangbah ka Jylla Assam u Dr. Numal Momin ha ingsah jong u.
Katkum ka tyllong khubor ba la ïohlum la khmihlynti ba u Momin un pynïasoh bad ka BJP ha taiew bakhatduh mynta u bnai.
Ka tyllong khubor ka ïathuh ruh ba ki don arngut ki kyrtong kiba pan tiket na ka BJP ban ïakhun na Mendipathar ba kynthup ïa u FW Momin bad u Digross D. Shira.
