Na ophis treikam phah mih jubor ka FKJGP ïa u Director ka Printing and Stationary

Shillong, K’lyngkot, 11: Ki dkhot jong ka Federation of Khasi Jaiñtia and Garo Peoples (FKJGP) hapoh ka jingïalam jong u Asst. General Secretary u Bah Reginald Thabah ha ka sngi Balang ki la leit rung hapoh ka shlem treikam jong ka Directorate of Printing and Stationary khlem kano kano ka jingai jingtip bad phah mih mardor ïa u Director u SR Marak hadien ba ka jingaipor kaba 10 sngi jong ka seng ïa ka Sorkar Jylla ka la kut noh.
Ha ka jingïakren bad ki lad pathai khubor u Bah Reginald u la ong lada u Director um lah ban ai ka jingïatreilang, ka seng kam banse ban shim da kiwei pat ki sienjam namarba ka jingtohkit pyrshah halor ka jingkynnoh ba u donkti ban pyndonkam bakla ïa ka pisa kaba kot 2 klur tam ka dang ïaid haduh mynta.
“Ngim shahniah satia ïa ka jingtohkit katba u Director um pat shah pynkynriah kam bad katba u dang don hi haduh mynta ha kane ka ophis treikam. Khnang ba ka jingtohkit kan long kaba khuid ngi dawa ba dei ban pynkynriah mardor ïa u,” u la ong.
Na ka liang jong u SR Marak ha ka jingïakren bad ki lad pathai khubor u la ong ba u don ka hok ban ïada ïalade bad ban pynshai hakhmat ka kynhun tohkit katba ka jingtohkit ba la thung da ka Sorkar ka dang ïaid shakhmat.
Hadien kane, ki Pulit ka East Khasi Hills District ki la wan poi ha kane ka shlem treikam tang hapoh khyndiat minit ba ki dkhot bad ki nongïalam ka FKJGP ki la mih noh.
Khyndiat kynta shwa ban kut ka por trei, ki nongtrei jong kane ka ophis ki la pynlong da ka jingïalum khrui hakhmat kane ka ophis treikam ban pynrem jur ïa ka jingrung kyndit jong ki dkhot ka FKJGP ha kane ka ophis treikam khlem kano kano ka jingai jingtip.
Ki nongtrei ki la kynnoh ba ki dkhot ka FKJGP kim shym la ai jingtip satia halor kane ka jingwan rung bad kynnoh ruh ba ka jingleit rung kyndit ka la wanrah ïa ka jingsyier mynsiem hapdeng ki nongtrei.