Shillong, K’lyngkot, 11: Ka Kynhun Myntri jong ka Sorkar Jylla ha ka sngi Palei ka la mynjur ïa ka Drug Reduction, Elimination and Action Mission (DREAM) khnang ban pyllait ïa ka Jylla Meghalaya na ka jingjyllei jong u drok.
Ha kine ki khyndiat snem ka tnat Pulit ka la trei borbah ban kem ïa ki snar nongkhaii drok bad ïa ki nongdie khutia ha kiba bun ki jaka bad pynlong ruh ïa ka jingkhynra na ka por sha ka por hadien ba ka tnat Pulit ka la pynbna ban ïakhun thma pyrshah ïa u drok ha kane ka jylla.
U Myntri Rangbah ka Jylla ha ka jingïakren bad ki lad pathai khubor hadien ba la ai ka jingïalang Kynhun Myntri, u la ong, ba ka thong jong ka Sorkar lyngba ka “DREAM” ka long ban pynthikna ba kane ka kam kaba ïadei bad u droks yn shimkhia ha ka rukom kaba dei bad kum ka mishon.
U la ong ba katkum kane ka mishon, ka Sorkar kan sa buh ïa ki Rehabilitation, ka Counselling, bad ka jingpynsngewthuh paidbah ïa ka jingshyrkhei bad ka jingma kaba ap na ka jingpyndonkam ïa u drok.
Ha kane ka jingïalang, ka Kynhun Myntri ka la mynjur ruh ïa ka Meghalaya Tourism Policy 2023 khnang ban kyntiew ïa ka kam jngohkai pyrthei ha kiba bun rukom bad ban pynkha ruh ïa ki lad aikam aijam.
Nalor kine, ka Kynhun Myntri ka la mynjur ruh ïa ka Meghalaya State Organic & Farming Policy 2023 ban pynurlong ïa ka thong ha kaba pynmih ïa ki mar rep khlem da donkam ban ai dawai sboh.
