Kob u Conrad ban dang jop suk na South Tura ha elekshon MLA 2023

Shillong, K’Lyngkot 11 : U Myntri Rangbah ka Jylla Conrad K Sangma ba dei ruh u National President ka NPP ha ka sngi Balang u la kob ba un dang jop suk bad kham bun ha ka elekshon MLA na South Tura kaban sa long shen.
“Kam don ei ei ban tieng ne syier namar ngi la trei shitom bad ngim shym la kheiñsting satia bad kumta ngi kyrmen skhem ba ngin jop suk na South Tura,” ong u Conrad haba kren bad ki lad pathai khubor.
Katei ka jingkren jong u Conrad kadei halor ka jingkam jong u MLA barim ka South Tura, u John Leslee K Sangma da kaba ong ba dei na ka jingtieng ba u Myntri Rangbah ka Jylla mynta u la buh da ka dur jong u man ka 10 mitar ha Tura.
Da kaba ong ba u sngew thamula ïa katei ka jingkren jong u, u Myntri Rangbah u la ong ba ïa kitei ki dur la buh da ki nongïalam ha ka por ba plie ïa ki projek bad kane kam dei shuh ka kam kaba thymmai. ‘Ngam tip balei mih ka kyntien ba tieng tang namar katei,” u la ong.
Nalorkata, u ong ruh ba kiwei ki sorkar ha kiwei ki jylla la ka jong ki prokram jong ka sorkar jylla ne sorkar pdeng ki ju don beit kum kitei kumta u sngew thamula ban mih pynban kum kitei ki jingkynnoh.
Haba ïadei pat bad ka jingkam jong u Bernard, u Conrad u la ong ha u 2018 ki la don 13000 ngut ki paidbah ba kyrshan bad kumta u ong ba ka jingkam u Bernard ban ïoh lut ïa kitei ki vote kadei ka bym lah satia ban long lano lano ruh.
“Ngam lah ban len ba u trei na bynta jongnga ha katei ka por bad ïarap ïa ka kum u riew shimet namar um don bad kano kano ka party hynrei ban kam ba ngi la jop namar kata, nga sngew ba kata kam dei satia,” u la ong.
Halor ka jingkylli la ka jingjied ïa u Myntri Rangbah kan dei beit katkum ka jingïoh bun ngut ki MLA ha Khasi – Jaintia bad rilum Garo, u Conrad u la ong, “Kata kadei ha kato ka por. Hynrei mynta kaei kaba jia ïa kaban sa wan dei ki MLA ban rai da ka mon laitluid bad ïa kata ngam don ei ei ban ong.”