Shillong, Kyllalyngkot, 10 : Ka BJP ha ka Sngi Ba ar ka la kular ban pyndep ïa baroh ki projek ba sahteng jong kane ka sorkar bad sorkar ba rim kynthup ruh ïa baroh kito ki projek kiba u Myntri Rangbah u Conrad K Sangma u la shu plie kyrkieh khlem pat da dep tei ïa ki.
Ka BJP ka la ong ki sorkar kiba la leit ki la buh maw nongrim ïa kiba bun ki projek hynrei kine haduh mynta ki dang sahteng ne sah khongreng bad tang ban ïoh plie la shu plie khlem pat da pyndep tang namar ka election.
“ Kane ka dei kaba la ju jia hi ha kane ka jylla Meghalaya. Ki Seng Sainpyrthei ki pyrkhat ba ki paid nongthep vote kin klet tang namar ba plie ïa kine ki projek shwa ka election bad kin ai vote ïa ki hynrei kam long kumta” ong ka BJP
U President ka BJP u bah Ernest Mawrie u la ong “ Ka BJP ka kular ban pyndep ïa baroh ki projek ba pawnam hapoh ka jylla ka tang shu la ïoh ban thaw ïa ka sorkar. Kat kum kata ka thong ba 100 sngi jongka BJP, ka sorkar ban ïalam da ka BJP kan thaw ïa ka Committee ba kyrpang ban thoh kyrteng ïa baroh ki projek kiba dang sahteng khnang ban shim khia ban pyndep kawei hadien kawei kat kum ka jingdawa jong ka kam”.
U la pynrem jur ruh ïa ka jingkyrkieh kane ka sorkar ban plie ïa ki projek kiba tang dep tei ne shna ruh ym pat dep lut tang namar ka election. U la ong ba ki paidbah ki ïohi ïa ki kam buit tuh ka NPP. Ki paidbah ki ïohi ba kane ka sorkar ka shu shong kli kti jan san snem mynta bad mynta la shu leh kyrkieh lut kat ïa kaba don. Ula ong ki paidbah ki la ïohi lut ruh ba tang na ka daw jongka election la shu plie ïa ki projek khlem pat pyndep. U la ong ba ka BJP ka don ha kane ka sorkar tang namar ba ka kwah ba ka sorkar kan skhem.
U la ong ruh ba dei ka BJP kaba pynpaw ïa ki kam bamsap ha kane ka sorkar ar snem mynshwa. U bah Mawrie u la ong ba ka BJP kan trei na ka bynta ki paidbah ba kano kano ka projek kaba ai jingmyntoi ïa ki paidbah yn pyndep shwa ïa kita bad kan peit ruh ba baroh ki projek dei ban pyndep hapoh ka por ba la buh.
