Shillong, K’Lyngkot 11 : Ka Hill State People’s Democratic Party (HSPDP) ha ka sngi Balang ka la pynbna ïa ka thup kyrteng jong ki hynñiew ngut ki kyrtong kiban aireng ha kane ka elekshon MLA kaban long shen ha ka jylla.
Napdeng kitei ki kyrtong, u President bad MLA barim ka Rambrai Bah KP Pangniang udei uwei na kiban aireng ha kane ka elekshon. Une u kyrtong un hap ban ïakhun pyrshah ïa u kyrtong ka NPP, Bah Kimfa S Marbañiang uba dang shu dep resaiñ shen kum u MLA katei ka thaiñ.
Kiwei pat ki kyrtong ki kynthup ïa ka Kong Evalyne Kharbani na Mawhati, Bah Primson Makdoh na Umsning, Bah Shakliar Warjri na Mawthadraishan, Bah Sanjied Kynsai Shangrit na Nongstoin, Bah Methodeius Dkhar na Mawshynrut bad Bah Milansing na Mawkyrwat.
Haba kren bad ki lad pathai khubor, u Chairman ka Election Committee, Bah Witting Mawsor u la ong ba ka party shen kan sa pyllait ruh sa ïa ka thup kyrteng kaba ar kaba kynthup ïa ki 5-6 ngut ki kyrtong na East Khasi Hills bad Jaintia Hills.
Katkum ka jingong jong u, ka party ka pynkhreh mynta ban pynïeng haduh kumba 12-15 ngut ki kyrtong ha kane ka elekshon ban wan.
Watla katei ka party ka don arngut ki MLA kiba jop ha u 2018 hynrei kitei baroh arngut kata kynthup ïa u Bah Samlin Malngiang MLA ka Sohiong u ba la phet noh bad pynkhreh ban ïakhun noh na ka NPP katba u Bah Renikton L Tongkhar, MLA ka Mawkyrwat pat u ban ïakhun na ka UDP.
“Ki paidbah ka jylla ki dang shaniah ha ka party khamtam haba ïadei ban ïada ïa ka jinglong tynrai jong ka Jaidbynriew bad ban ïada ïa ka khyndew ka shyiap bad ruh ïa ki ain kiban ïada ïa ka jylla,” u la ong.
