Ban weng ïa ka jingdheng kali ha Shillong wanrah ka Sorkar da ki Bos kit khynnah skul
Shillong, K’lyngkot, 11: U Myntri Rangbah ka Jylla u Conrad K. Sangma ha ka sngi Balang u la kaweh lama ban pyllait paidbah ïa ki 30 tylli ki bos ban kit ïa ki khynnah skul bad kumjuh ruh ïa ki kali ba kit ïa ki nongleit jingleit, leit jngohkai pyrthei bad ïa ki kali ban kit ïa ki mar rep ba la pynmih da ki nongrep ha ka jingïalang kaba la long ha U Soso Tham Auditorium, Shillong.
Haba kren ha kane ka jingïalang u Conrad K Sangma u la ong ba ka Sustainable Transport and Efficient Mobility Society (STEMS) program ka dei kaba la buh thong ban weng ïa ka jingdheng kali ha nongbah Shillong kaba la pynsuhsat ïa ki paidbah nongleit nongwan.
“Ki la bun ki jingai jingmut ha ki por ba ladep bad ngi la ïakhun ban wad ïa ki lad ki lynti namarba kane ka jingeh ka long kaba kyllaiñ bha,” u la ong.
“Ki la don ruh ki jingpyrshang ban weng ïa ka jingeh jong ka nongbah Shillong bad nga ngeit ba kane ka pyrshang lyngba ka STEM prokram kan long kaba jop,” u la ong.
U la ïathuh ba ka Prime Agriculture Response Vehicles ka long ban ïarap ïa ki nongrep ha kaba pynkit ïa ki mar rep sha ki jaka iew.
“Ngi la rai ba shi sien shisnem ngin bteng ïa kane ka prokram bad ngin sa pyrshang ban lum lang ïa ki kynhun jong ki nongrep khnang ba ka jingshalan ïa ki mar rep kan long kaba seisoh bad kan ïarap haduh katta katta ïa ki nongrep,” u la ong.
“Ka Prime Tourist Vehicles ka dei ka thong ban kiew ïa ka jngohkai pyrthei bad ban ai ka jingshakri kaba bha tam ïa ki nongjngohkai pyrthei ha ka leit ka wan bad ha kajuh ka por kan long ruh ka lad kamai na ka bynta ki nongsengkam,” u la bynrap.
Shwa kane, ka CEO jong ka STEMS ka Kong Isawanda Laloo ka la ong ba ïa kine ki Bos yn sa pyndonkam da ki khynnah skul bad ha kajuh ka por da ki nongtrei sorkar haba ki leit sha ki kam ki duk.
Ka STEMS ka kynthup ïa ki nongmihkhmat na ka tnat pynïaid kali ki Pulit, Pulit, ka tnat Pule Puthi, ka tnat Transport. ki bor synshar district bad ka tnat Pynroi Sor. Kine ki bos ki dei kiba la pyndait ruh san tylli ki CCTV camera ha manla kawei pa kawei ka bos, kata, nakhmat, nadien, na ka jaka shong u nongniah, na ka jaka ba kiew ki nongshong kali bad na ka jaka shong.
Kine ki Bos ki don ruh ïa ki GPS bad ki LED Screen kiba pyni ïa ki jaka ba leit bad wan.
Ïa ki nongniah bad ïa ki nongïarap, yn sa ai jinghikai da ka Meghalaya Skills Development Society.